भांगरभूंय | प्रतिनिधी
-चार वर्सांत 15,503 वाहनांची नोंदणी
पणजी : गोंयांत इलेक्ट्रीक वाहनांच्या खरेदीत दरवर्सा वाड जायत आसा. पूण पोरूंचे तुळेंत अंदूं मात विक्री उणी जाल्या. इलेक्ट्रीक वाहनां खातीर सुरवातीक लागू केल्ली सबसीडी (अनुदान) सरकारान बंद केल्ल्यान विक्री उणी जावपाची शक्यताय आसा.
इलेक्ट्रीक वाहनां खातीर ‘फेम’ येवजणे विशीं राज्यसभेंत विचारिल्ल्या लेखी प्रस्नांचे जापेंत केंद्रीय अवजड उद्येग राज्यमंत्री क्रिशन पाल गुर्जर हांणी फाटल्या चार वर्सांत देशभरांत नोंदणी जाल्ल्या इलेक्ट्रीक वाहनांची आंकडेवारी सादर केल्या. हे आंकडेवारींतल्यान गोंयांत दरेक वर्सा इलेक्ट्रीक वाहनांचे विक्रेंत वाड जायत आशिल्ल्याचे दिसता. पूण 2022 चे तुळेंत 2023 वर्सां मात विक्री उणी जाल्या.
2020 त 82 इलेक्ट्रीक वाहनां खरेदी केल्ली. 2021 त हो आंकडो 1,096 जालो. 2022 त 2021 चे तुळेंत 4,592 चड वाहनांची नोंदणी जाल्ली. ते उपरांत 2023 त आतां मेरेन 8,637 जाणांनी इलेक्ट्रीक वाहनां खरेदी केल्यात. पूण पोरूंचे तुळेंत ही वाड लक्षांत घेतल्यार अंदूं 2,949 चड वाहनांची नोंदणी जाल्ल्याचे दिसून येता.
वायू, ध्वनी, प्रदुशण अाडावपाक केंद्र सरकारान इलेक्ट्रीक वाहनां खरेदीक उर्बा दिवपाचे निश्चीत केले उपरांत देशभरांतल्या लोकांनी इलेक्ट्रीक वाहनां खरेदी करपाक प्राधान्य दिला. चडांत चड गोंयकारांनी इलेक्ट्रीक वाहनां खरेदी करची हे खातीर राज्य सरकारानूय सुरवातीक सबसीडी जाहीर केली आनी जायत्या जाणांक सवलत लेगीत दिली. पूण आतां सरकारान इलेक्ट्रीक वाहनां वयली सबसिडी बंद करपाचो निर्णय घेतिल्ल्यान ताचो परिणाम अशा वाहनांचे विक्रीचेर जाला. मंत्री गुर्जर हांणी दिल्ले आंकडेवारींतल्यान हे स्पश्ट दिसून येता.
मजगतीं, देशांतल्या सुमार 28.77 लाख नागरिकांनी फाटल्या चार वर्सांत इलेक्ट्रीक वाहनांची खरेदी
केल्या. सगल्यांत चड इलेक्ट्रीक वाहना उत्तर प्रदेश 5,10,058 आनी महाराष्ट्रांत 3,51,587 नागरिकांनी खरेदी केल्ल्याचेय आंकडेवारींतल्यान दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
