भांगरभूंय | प्रतिनिधी
शेतकी खात्याच्या वरिश्ठ अधिकाऱ्याची म्हायती
पणजीः गोंयांत ड्रोन दिदी ह्या उपक्रमाक अजून मेरेन कसलोच प्रतिसाद ना. गोंय सरकारान पुराय तयारी करून ड्रोन दिदी विशींचो प्रस्ताव केंद्र सरकाराक धाडला. पूण केंद्र सरकारा कडल्यान अजून कसलोच प्रतिसाद येवंक ना. शेतकी खातें ड्रोनाचे पुरवणेची वाट पळयता, अशी म्हायती शेतकी खात्याच्या वरिश्ठ अधिकाऱ्यान दिली.
नमो ड्रोन दीदी येवजण ही एक केंद्रीय येवजण आसा. गांवगिऱ्या वाठारांतल्या बायलांक ड्रोन पायलट आनी तंत्रगिन्यानाच्या बगळग्यार शेतकी मळार उद्देजक जावपा खातीर प्रशिक्षण दिवन तांचे सक्षमीकरण करप, हो ह्या येवजणेचो मुखेल उद्देश आसा. ह्या उपक्रमाचो मुखेल भर शेती पद्दतीचें आधुनिकीकरण करपाचेर आसा, तेच वांगडा ग्रामीण बायलां खातीर शाश्वत उपजिविकेचीं प्रगतीचीं दारां उक्तीं करप आसा.
हे विशीं अदीक म्हायती दितना शेतकी खात्याच्या वरिश्ठ अधिकाऱ्यान सांगलें की गोंयांत अजून मेरेन एकय बायल ड्रोन दिदी ना. पूण ड्रोन दिदीचो प्रस्ताव केंद्राक धाडला.
मार्च 2025त आमी सगले तपशील केंद्रीय शेतकी मंत्रालयाक धाडल्यात. हे येवजणेची अंमलबजावणी
केंद्रीय सारें खातें करता. आमी गोंयांतल्या 10 आपमजत गटांची नांवां केंद्राक धाडल्यांत. पूण अजून मेरेन हे 10 ड्रोन गोंया खातीर येवपाचे आसात, अशी म्हायती अधिकाऱ्यान दिली.
सद्या ह्या ड्रोनांचे भाग चीनांतल्यान येतात. राष्ट्रीय सुरक्षेचो प्रस्न म्हूण भारत सरकारान ह्या भागांची आयात बंद केल्या. सद्या भारत स्वदेशी ड्रोन तंत्रगिन्यानाचेर काम करता. एकदा स्वदेशी ड्रोन तयार जालो की ही येवजण परतून सुरू जातली. गोंया सयत महाराष्ट्र राज्याचे हेर आपमजत गटांच्या बायलांक ड्रोनाची पुरवण जातली, अशें अधिकाऱ्यान सांगलें.
वेंचून काडिल्ल्या आपमजत गटाच्या वांगड्यांक नागरी उड्डाण महासंचालका कडल्यान मान्यता प्राप्त ‘रिमोट पायलट ट्रेनींग ऑर्गनायझेशन्स’ कडेन 15 दिसांचो सर्वसमावेशक वेवसायीक अभ्यासक्रम पुराय करचो पडटा. ह्या अभ्यासक्रमांत 5 दिसांचो सक्तीचो ड्रोन पायलट लायसन्स ट्रॅक आनी उपरांत अन्नद्रव्यां, जंतूनाशकां आनी नॅनो-सारें मारपा सारक्या विशेश अचूक शेती कुशळटायेचेर भर दिवपी 10 दिसांच्या मॉड्युलाचो आस्पाव आसा.
मजगतीं, आपमजत गटाची दुसरी एक वांगडी इलेक्ट्रिकल त्रुटी निवारण, मेकॅनिकल दुरुस्ती आनी भौतीक कार्यावळी सांबाळपा खातीर “ड्रोन असिस्टंट” म्हूण एकाच वेळार प्रशिक्षण दितात.
सद्या शेतकी खातें, ग्रामीण उदरग खातें, सारें खातें, नागरी उड्डाण मंत्रालय आनी बायलां आनी भुरगीं उदरगत मंत्रालय ही पांच खातीं हे येवजणेच्या अंमलबजावणीचो भाग जावन आसात.
ड्रोन घेवपा खातीर आपमजत गटांक 50 टक्के अनुदान मेळटा. 40 टक्के हें केंद्र सरकार दिता जाल्यार 10 टक्के हें राज्य सरकारा दिता, अशें अधिकाऱ्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
