भांगरभूंय | प्रतिनिधी
न्यायालयांत प्रकरण मिटोवपा खातीर कोट्यांनी रुपयांची मागणी
पेडणेः गावडेवाडो मोरजे हांगासरल्या मे फेअर रिसाॅर्ट आस्थापनाचें एक प्रकरण न्यायालयांत आशिल्लें. हें प्रकरण मिटोवपा खातीर राजेश दाभोलकार हांणी वेवस्थापनाच्या वेवस्थापका कडेन व्हड रकमेची मागणी केली. तशेंच ड्रोनाचो वापर करून व्हड प्रमाणांत फोटू शूट लेगीत केलें. अशे तरेची रिसॉर्टाच्या वेवस्थापकान मांद्रें पुलिसां कडेन कागाळ दिले उपरांत राजेश दाभोलकार हांचेर गुन्यांव नोंद करून तांकां अटक केली.
मांद्रेंचे पुलीस निरिक्षक गिरेंद्र नायक हांणी दिल्ले म्हायती प्रमाण राजेश दाभोलकार हांचे आड मोरजी हांगासरल्या मे फेअर ह्या रिसॉर्ट वेवस्थापकान एक लेखी स्वरुपांत कागाळ दिली. ह्या रिसॉर्टा विशीं एक कागाळ आशिल्ली, आनी हें प्रकरण न्यायालयांत आशिल्लें, आनी हें प्रकरण मिटोवपा खातीर राजेश दाभोलकार आनी हेरांनी व्हड प्रमाणांत पयशांची मागणी केली. पयशे दिवंक नाशिल्ल्यान गाळी संवल्यो आनी जिवेशी मारपाची धमकी लेगीत तांकां दिल्ली.
ते प्रमाण पुलिसांनी राजेश दाभोलकार आनी हेरां आड गुन्यांव नोंद करून राजेश दाभोलकार हांकां अटक केल्ल्याची म्हायती पुलीस निरिक्षक गिरेंद्र नायक हांणी दिली.
फुडलो तपास मांद्रें पुलीस करतात. रोखडीच हेरांकूय अटक करतले अशी म्हायती निरिक्षक गिरेंद्र नायक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
