भांगरभूंय | प्रतिनिधी
खबरां संस्था
हैदराबादः तिसरे वन-डेंत भारतान 6 विकेटींनी जैत मेळोवन 2013 उपरांत मायभुंयेत टी-20 माळ जिखली. भारतान 2-1 अशी ही माळ आपल्या नांवार केली. ते खातीर विराट कोहली आनी सूर्यकुमार यादव हांणी म्हत्वाचें योगदान दिलें. पयल्यो दोन विकेटी 30 धांवड्यांत पडले उपरांत हे जोडयेन तिसरे विकेटी खातीर 104 धांवड्यांची भागिदारी करून भारताक जैताच्या हुमऱ्याक हाडले. विराट आवट जाल्या उपरांत हार्दिक पंड्यान दिनेश कार्तिका वांगडा घेवन जैताचे सोपस्कार पुराय केले. ऑस्ट्रेलियेच्या 7 बाद 186 धांवड्यांक भारतान 19.5 ओव्हरींत 4 बाद 187 अशी जाप दिवन 6 विकेटीनी जैत मेळयले.
20वी ओव्हर सुरू आसतना जैता खातीर घाई करून विराटान डेनियल सॅम्पास आपली विकेट दिली. तो आवट जालो तेन्ना जैता खातीर फकत पांच धांवड्यो जाय आशिल्ल्यो. ताणे 48 बॉलांत 4 सके आनी 3 चौक्यांनी 63 धांवड्यो केल्यो. सूर्यकुमारान 5 सके आनी 5 चौक्यांनी 36 बॉलांत 69 धांवड्यो केल्यो. हार्दिक 25 धांवड्यांचेर नाबाद उरलो. सॅम्सान दोन विकेटी घेतल्यो. मोहालींत ऑस्ट्रेलियेन पयले टी-20त भारताक हारयले. नागपूर आनी हैदराबादची मॅच जिखून भारतान माळ आपल्या नांवार केली. अक्षर पटेलान ऑस्ट्रेलियेच्यो 3 विकेटी 33 धांवड्यांत घेवन जैताक हातभार लायलो.
फॉर्मांत नाशिल्ल्या केएल राहुलाक (1) डेनियल सॅम्सान पयलेच ओव्हरींत बाद करून भारताक पयलो धपको दिलो. 30 धांवड्यो जाल्ल्यो तेन्ना पॅट कुमिन्सान रोहित शर्माक डेनियल सेम्व वरवीं कॅच आवट करून सगळ्यांत व्हडलो धपको दिलो. मात विराट कोहली आनी सूर्यकुमार यादव ही जोडी जमली आनी तांणी 11.2 ओव्हरींत भारताचो शेंकडो पुराय करून जैताचे दिकेन वचपाक सुरवात केली. हार्दिक कार्तिक जोडयेन भारताक जैतिवंत केलें.
ग्रीन, डेव्हिडाचे अर्द शेंकडे
निर्णायक म्हत्वाचे निमाणे टी-20 मॅचीत भारताचो कॅप्टन रोहित शर्मा टॉस जिखलो आनी अपेक्षे प्रमाण ऑस्ट्रेलियेक बॅटींग करपाक सांगलें. कॅमरून ग्रीन रोहिताचो हो निर्णय बरोच म्हारग पडटलो अशे तरेन खेळाक सुरवात केली. ताणे आनी एरोन फींच 44 धांवड्यांची सलामी दिली. तातूंत फींचाच्यो फकत 7 धांवड्यो आशिल्ल्यो. पंगडाच्यो 62 धांवड्यो जाल्ल्यो तेन्ना भुवनेश्वर कुमरान ग्रीनाक केएल राहुलाच्या हातांत कॅच दिवपाक लायलें आनी आपल्याक पंगडांत घेवपाचो निर्णय सारको हें दाखोवन दिलें. ग्रीनान फकत 21 बॉलांत 3 सणसणीत सके आनी 7 चौक्यांनी 52 धांवड्यो केल्यो. अक्षर पटेल आनी युजवेंद्र चहरान एरोन आनी स्टीव्ह स्मिथ (9) हांका आवट केलें. ग्लॅन मॅक्सवेलाक (6) दिनेश कार्तिकान यश्टीचीत करून ऑस्ट्रेलियेची स्थिती 4 बाद 84 अशी केली. पंगडाचो शेंकडो केल्या उपरांत जोश इंग्लीस (24) आवट जालो. अक्षराच्या बॉलार रोहितान ताची कॅच घेतली.
मॅथ्यू वेडाक (1) अक्षरान बाद करून ऑस्ट्रेलियेची घसरगुंडी घडोवन हाडली. 117 धांवड्यांत तांच्यो 6 विकेटी पडल्यो. टीम डेव्हीड आनी डेनियल सेम्स हांणी घसरगुंडी थांबयली आनी सातवे विकेटी खातीर धांवड्यो एकठांय करपाक सुरवात केली. तांणी सातवे विकेटी खातीर 70 धांवड्यांची भागिदारी केली. हर्षल पटेलान डेव्हिडाक बाद केलो. ताणे 4 सके आनी 2 चौक्यांनी 27 बॉलांत 54 धांवड्यो केल्यो. अश्टतासी सेम्सान नाबाद 28 धांवड्यो केल्यो. 20 ओव्हरींत ऑस्ट्रेलियेचो डाव 7 बाद 187 धांवड्यांत सोपलो. अक्षरान 33 धांवड्यांत 3 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
