भांगरभूंय | प्रतिनिधी
मुख्यमंत्री: 95 टक्के काम पुराय जाल्ल्याचो दावो
पणजी: मोपा आंतरराष्ट्रीय विमानतळाचें 95 टक्के काम पुराय जालां. विमानतळाच्या लोकार्पणाची तारीख अजून निश्चीत जाल्ली ना. पूण 8 डिसेंबरा उपरांत प्रधानमंत्री नरेंद्र मोदी हांचे हस्तुकीं विमानतळाचें उक्तावण जातलें अशें मुख्यमंत्री डॉ. प्रमोद सावंत हांणी स्पश्ट केलें.
शुक्रारा मोपा विमानतळार वचून कामाचो नियाळ घेतले उपरांत ते पत्रकारां कडेन उलयताले. मुखेल सचीव पुनीतकुमार गोएल, पेडणेंचे आमदार प्रवीण आर्लेंकार, जीएमआर कंपनीचे मुखेल कार्यकारी अधिकारी (सीईओ) आर. व्ही. शेषन, विमान उड्डाण खात्याचे संचालक डॉ. सुरेश शानभाग बी मानेस्त ह्या वेळार हाजीर आशिल्ले.
मोपा आंतरराष्ट्रीय विमानतळाचो गोंयाक व्हड फायदो जातलो. ताका लागून विमानतळ प्रकल्पाचें रोखड्या रोखडो लोकार्पण करपाचो यत्न सरकारा कडल्यान सुरू आसात. प्रधानमंत्री नरेंद्र मोदी हांचे हस्तुकीं विमानतळाचें उक्तावण करपाचें निश्चीत जालां. पूण तारीख अजून थारिल्ली ना. 8 डिसेंबरा उपरांत केन्नाय ह्या प्रकल्पाचें उक्तावण जावंक शकता अशें तांणी म्हणलें. विमानतळाचें 96 टक्के काम पुराय जालां. उरिल्लें काम तशेंच सर्व्हीस रोडाचें डांबरीकरण 25 नोव्हेंबरा मेरेन पुराय जातलें. फाटल्या कांय दिसां सावन विवीध आंतरराष्ट्रीय विमान अॅरलायन्स कंपनींनी मोपा विमानतळा कडेन कबलात करपाक सुरवात केल्या अशें तांणी सांगलें.
मोपा विमानतळ सुरू जाले उपरांत दाबोळी विमानतळ लेगीत सुरूच उरतलो हाची हमी केंद्रीय विमान उड्डाण मंत्रालयान दिल्या. ताका लागून दक्षीण गोंयच्या नागरिकांनी भियेवचें न्हय अशें तांणी स्पश्ट केलें.
मजगतीं, मोपा विमानतळा खातीर जमनी गेल्ल्या नागरिकांनी आपलीं पुराय कागदपत्रां सादर केल्यांत तांकां तांची लुकसाण भरपाय दितले. हेरांकूय ती रोखडीच मेळटली. आतां प्रकल्पाक जे विरोध करतात तांच्यो मागण्यो सरकारान मान्य केल्यात अशेंय मुख्यमंत्री डॉ. प्रमोद सावंत हांणी स्पश्ट केलें.
नामकरण विमान उड्डाण मंत्रालयाचे कक्षेंत
मोपा विमानतळाक कोणाचें नांव दिवचें हो निर्णय केंद्रीय विमान उड्डाण मंत्रालयाचे कक्षेंत येता. ताका लागून हे विशीं गोंय सरकार मंत्रालया कडेन चर्चा करतलें आनी उपरांतूच विमानतळाचें नांव निश्चीत जातलें अशें सांगून विमानतळाच्या नांवां वयल्यान फाटल्या कांय दिसां सावन सुरू आशिल्ल्या वादाचेर मुख्यमंत्री डॉ. प्रमोद सावंत हांणी पड्डो उडोवपाचो यत्न केलो.
थळाव्यांक नोकऱ्यांनी प्राधान्य: शेषन
मोपा विमानतळ प्रकल्पांत आतां मेरेन थळाव्या तरणाट्यांकूच चडांत चड संद दितले. विमानतळ कार्यान्वीत जाले उपरांत पयलीं विमानतळा खातीर जमनी दिल्ल्या थळाव्या पेडणेंकारांकूच नोकरेंत प्राधान्य दितले. उपरांत हेर वाठारांतल्या तरणाट्यांचो विचार करतले अशें सीईओ शेषन हांणी म्हणलें. विमानतळार सुमार दोन हजार तरणाट्यांक नोकऱ्यो उपलब्ध जातल्यो. तातूंत अभियंते, चार्टर्ड अकावटंट बी सारक्या पदांचो आस्पाव आसतलो अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
