782 सरकारी वाहनां कावलांत

भांगरभूंय | प्रतिनिधी

38 कदंब बशींचोय आस्पाव

1 एप्रील सावन अंमलबजावणी

पणजी: 15 वर्सां पुराय जाल्लीं सरकारी वाहनां कावलांत काडपाचो निर्णय केंद्र सरकारान जारी केले उपरांत 1 एप्रील 2023 सावन गोंय सरकारच्या विवीध खात्यांतलीं सुमार 782 वाहनां कावलांत काडटले. जाल्यार कदंब परिवहन म्हामंडळाच्यो 38 बशी कावलांत काडल्यात.

मुख्यमंत्री डॉ. प्रमोद सावंत हांणी अर्थसंकल्पीय अधिवेशनांत 1 एप्रील सावन सरकारी खात्यांतलीं 15 वर्सां पुराय जाल्लीं वाहनां कावलांत काडटले अशें जाहीर केल्लें. ते प्रमाण मोटार, ट्रक अशीं मेळून सुमार 782 वाहनां रस्त्यार हाडप बंद केलां. जाल्यार ह्या निर्णया प्रमाण 38 कदंब बशी कावलांत काडल्यात. फुडल्या स म्हयन्यांत हे संख्येंत आनीक वाड जातली. अशी म्हायती कदंब म्हामंडळाचे सरवेवस्थापक एसएल घाटे हांणी ‘भांगरभूंय’ कडेन उलयतना दिली.

खाजगी वाहनां भाड्यान घेवपाची प्रक्रिया सुरू

– सरकारी खात्यांतलीं जीं वाहनां कावलांत काडटले ते सुवातेर नवी वाहनां खरेदी करचे नात. कदंब म्हामंडळा खाला खाजगी वाहनां घेवन ती सरकारी खात्यां खातीर वापरपा विशींची येवजण मुख्यमंत्री डॉ. प्रमोद सावंत हांणी अर्थसंकल्पीय अधिवेशनांत जाहीर केल्ली.

– थळाव्या तरणाट्यांक रोजगार मेळचो आनी नवीं वाहनां खरेदी करपा खातीरचो खर्च वाटावचो ह्याच उद्देशान सरकारान ही येवजण जाहीर केल्या.

– हे येवजणेची अंमलबजावणी करपाची प्रक्रिया कदंब म्हामंडळान सुरू केल्या. हे विशीं म्हामंडळ फुडल्या कांय दिसांतच निविदा जारी करतलें. जांकां स्वताचीं वाहनां सरकारी खात्यांत भाड्यान लावपाचीं आसात तांकां ते खातीर म्हामंडळा कडेन नोंदणी करची पडटली.

– वाहनां प्रमाण आनी किलोमिटरा प्रमाण सरकार वाहन धनयांक दरेक म्हयन्याक भाडे दितलें अशी म्हायती गोपांनी दिली.

दुसर्‍या टप्प्यांत सुमार 2.10 लाख खाजगी वाहनां कावलांत

15 वर्सां पुराय जाल्लीं सगल्या राज्यांतलीं सरकारी वाहनां 1 एप्रील 2023 सावन केंद्र सरकारान कावलांत काडल्यांत. आतां दुसर्‍या टप्प्यांत अशे तरेचीं खाजगी वाहनांय कावलांत काडपाचो विचार केंद्र सरकारा कडल्यान जायत जाल्यार गोंयांतलीं 2,10,563 वाहनां कावलांत वतलीं. ह्या वाहनांचे स्क्रॅपींग ‘आरव्हीएफएस’ (रजिस्टर्ड व्हेइकल स्क्रॅपींग फॅसिलिटी) केंद्रांतूच करप अनिवार्य आसा. हीं केंद्रां राज्यांत येरादारी खात्या कडल्यान निश्चीत करतले. हो निर्णय लागू जायत जाल्यार गोंयांतलीं 2,10,653 वाहनां कावलांत वतलीं. केंद्रीय येरादारी मंत्री नितीन गडकरी हांणी राज्यसभेंतले लेखी प्रस्नाचे जापेंतल्यान ही आंकडेवारी सादर केल्या.