भांगरभूंय | प्रतिनिधी
न्यूयॉर्क, खबरां संस्था ः संवसारभर अर्थीक असमानते विशीं लोकां मदीं हुस्को वाडत आसा. हें आजूनय एक व्हडलें आव्हान आसा. प्यू संशोधन केंद्रान 36 देशांनी केल्ल्या सर्वेक्षणांत 54% लोकांनी गिरेस्त आनी गरीब हांचे मदीं वाडत वचपी फरक हो आपल्या देशांतली एक मुखेल समस्या आसा अशें मान्य केलां. दुसरे वटेन 30% लोकांनी ताका मध्यम समस्या अशें म्हणलें. 64% भारतीयांनी गिरेस्त आनी गरीब हांचे मदीं वाडत वचपी फरक ही एक व्हड समस्या अशें म्हणलें.
10 भारतीयांतले 7 भारतीय धर्मीक आनी जातीय भेदभाव ही एक व्हड समस्या मानतात, अशें सर्वेक्षणांतल्यान स्पश्ट जालां. दुसरे वटेन 80% भारतीय लोक गिरेस्त लोकांचो राजकी प्रभाव हो अर्थीक असमानताय वाडपाचें मुखेल कारण अशें मानतात. तशेंच अर्थीक असमानतेच्या कारणां मदीं भारतीय शिक्षण वेवस्थेक आनी तंत्रीक उदरगतीक दोश दितात. 72% भारतीयांनी शिक्षण वेवस्थेक अर्थीक असमानतेचें कारण मानलें. ऑटोमेशन असमानतायेक चालना दिता अशें 73% भारतीयांनी मान्य केलें. हो आंकडो संवसारीक सरासरी परस 63% चड आसा.
भारताचो अर्थीक फुडार आशावादी
चड उत्पन्न आशिल्ल्या देशां भायर दक्षीण आनी दक्षीण पूर्व आशियांतले देश देखीक भारत, बांगलादेश, इंडोनेशिया हांगा लोक आपल्या भुरग्यांच्या अर्थीक फुडारा विशीं आशावादी आसात.
अर्थीक फुडारा विशीं संवसारभर गंभीर हुस्को
ह्या सर्वेक्षणांत चड उत्पन्न आशिल्ल्या देशांचो आस्पाव केल्लो. अमेरिका, जपान आनी फ्रांसांतल्या लोकांनी अर्थीक फुडारा विशीं गंभीर हुस्को उक्तायलो. आवय-बापायच्या तुळेंत फुडाराक अर्थीक स्थिती चड वायट जातली अशें हांगाचे लोक मानतात. 57% लोकांच्या मतान फुडली पिळगी अर्थीक नदरेन दुबळी आसतली. हो भंय चड उत्पन्न आशिल्ल्या देशांनी आसा.
66% लोक म्हणटात, अर्थीक वेवस्थेंत व्हड बदल
प्यू संशोधन केंद्रान 36 देशांतल्या 41,503 लोकां कडेन चर्चा केली. देश आपले अर्थीक वेवस्थेंत व्हड बदल करपाक सोदता अशें सर्वेक्षणांतल्यान दिसून आयलां. संवसारीक पांवड्यार 66% लोक मानतात सध्याची अर्थीक वेवस्था पुरायपणान बदलपाची गरज आसा. भारतांतलेय 66% लोकांक हे मत मान्य आसा. संवसारभर लोक आपले अर्थवेवस्थेंत सुदारणा करपाची मागणी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
