भांगरभूंय | प्रतिनिधी
भांगरभूंय प्रतिनिधी
पर्वरीः विशांत राजपुरोहीत हाका 7 लाख रुपयांक फटोवपी अभिषेक विनोद गिरी (32, उत्तर प्रदेश) हाका पर्वरी पुलिसांनी लखनौ हांगच्या सरोजनी नगरांत अटक करून गोंयांत हाडलो. फाटल्या चार म्हयन्यां सावन तो फरार आशिल्लो.
अभिषेक गिरीन जानेवारी 2021 सावन सुकूर हांगा विशांत राजपुरोहिता हाचे बिल्डिंगेत रावपाक आयिल्लो. आपूण इन्टिलिजन्स ऑफिसर अशें ताणे राजपुरोहीत हाका सांगल्लें. आयबींत ताच्या चल्याक नोकरेक लायतां म्हणून ताणे ताचे कडल्यान 7 लाख रुपये घेतले. आनी तेन्नाच्यान तो ना जालो. आपल्याक फटोयलो म्हणून राजपुरोहितान पर्वरी पुलीस स्टेशनात कागाळ केली. पुलीस निरीक्षक अनंत गांवकारान आनी चवकशी अधिकारी उपनिरीक्षक प्रणिता मांद्रेकारान गिरी हाची चवकशी काडपाक सुरवात केली. ताचें मोबायल लोकेशन काडपाचो यत्न केलो तेन्ना तो आपलें सीमकार्ड बदलत रावता अशें दिसून आयलें. निमणे तो लखनौ सरोजनी नगरांत आसा अशी म्हायती मेळ्ळी.
पुलीस उपनिरीक्षक सीताराम मळीक, पुलीस महादेव नायक आनी योगेश शिंदे हांणी उत्तर प्रदेशांत वचून ताचो सात दीस सोद घेवन लखनौ पुलिसांचे मजतीन 27 एप्रीलाक ताका अटक केली, लखनौ न्यायालयान चार दिसांच्या ट्रान्सिट वॉरटाचेर ताका गोंयांत धाडलो. ताका म्हापशें पयलो वर्ग न्यायालयात 4 दिसांची पुलीस कादय दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
