भांगरभूंय | प्रतिनिधी
मुख्यमंत्री : सांगेंच्या लोकांक ‘म्हजें घर’ येवजणेचे अर्ज वांटले
भांगरभूंय । प्रतिनिधी
सांगें : सामान्य मनीस जिणेंत एकदांच घर बांदता. तें ताचे फुडले पिळगेक मेळचें, हीच ताची इत्सा आसता. गोंयांतल्या लोकांची सरकारी आनी कोनुनिदादचे जमनीर वयलीं अनधिकृत घरां कायदेशीर करचीं हे खातीर आपल्या सरकारान फुडाकार घेवन म्हजें घर ही येवजण तयार केल्या. हे येवजणेचे अर्ज वितरीत करतात. फुडल्या स म्हयन्यांत आमी घरां कायदेशीर करपा खातीर लागपी घराची सनदी घेवनूच तुमच्या मुखार येतले, अशी हमी मुख्यमंत्री डॉ. प्रमोद सावंत हांणी दिली.
सांगें मतदारसंघांतल्या लोकांक म्हजें घर येवजणेचे अर्ज वांटपा खातीर सांगें नगरपालिका सभाघरांत खाशेले कार्यावळीचें आयोजन केल्लें. ह्या वेळार मुख्यमंत्री उलयताले.
आपलें सरकार संवेदनशील आसा. म्हजे घर येवजणे खाला सरकारी, भाटकार, सोशियेदाद, आल्वारा, कोमुनिदाद, साळावली धरण पिडेस्तांक पुनर्वसन केल्ले जमनींतलीं घरां आतां कायदेशीर जातलीं. ह्या निर्णयाचो शेतकार, कश्ट करपी आनी सगल्या धर्मांच्या लोकांक फायदो जातलो, अशें मुख्यमंत्र्यान सांगलें.
ह्या वेळार माचयेर मंत्री सुभाष फळदेसाय, नगराध्यक्ष संतिक्षा गडकार, दक्षीण गोंय जिल्होधिकारी एगना क्लिटस, उपजिल्होधिकारी मिलिंद वेळीप, आदले आमदार वासुदेव मेंग गांवाकर, जिल्हो पंचायत वांगडी सुरेश केपेकार, मामलेदार सिद्धार्थ प्रबू, गट विकास अधिकारी पारितोष फळदेसाय, विवीध गांवचे सरपंच, नगरसेवक हाजीर आशिल्ले.
कांय दिसां आदीं केंद्रीय गृह मंत्री अमीत शाह हांचे हस्तुकीं म्हजें घर येवजणेचें उक्तावण केलें. आतां पुराय गोंयांत हे येवजणेच्या अर्जांचें वांटप करपाक सुरवात जाल्या. 2014 आदलीं गोंयांतलीं अनधिकृत घरां कायदेशीर करचे खातीर म्हजें घर येवजण हाडल्या, अशें मंत्री फळदेसाय हांणी सांगलें. रणजीत चिपळुणकर हांणी सुत्रसंचालन केलें जाल्यार मिलिंद वेळीप हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
