भांगरभूंय | प्रतिनिधी
उण्या दरान वीज खरेदीचे सरकाराचे यत्न
भांगरभूंय I प्रतिनिधी
पणजी : मोपा आंतरराष्ट्रीय विमानतळ कार्यान्वीत जाले उपरांत राज्याक दर दिसा सुमार 300 मेगावॅट विजेचो उणाव जाणवतलो. हातूंतल्यान मार्ग काडपाक राज्य सरकारान विवीध पर्यायांचेर विचार करपाक सुरवात केल्या. उण्या दरान वीज खरेदी करपा खातीर कांय कंनीं कडेन चर्चा सुरू केल्यात, अशी म्हायती सरकारांतल्या सुत्रांनी दिली.
सध्याचे स्थितींत राज्याक दर दिसा सुमार 600 ते 650 मेगावॅटची गरज आसा. ते प्रमाण केंद्राच्या उत्तर आनी दक्षीण सेक्टरांतल्यान अनुक्रमे 380 आनी 80 अशी 460 मेगावॅट वीज राज्याक मेळटा. ते भायर हेर राज्यां कडल्यान 175 मेगावॅट वीज मेळटा, अशी म्हायती पावसाळी अधिवेशनांत वीज मंत्री सुदिन ढवळीकार हांणी लेखी प्रस्नाच्या जापेंतल्यान दिल्ली.
बुधवारा आमच्या प्रतिनिधी कडेन उलयतना तांणी म्हणलें, वीज गिरायकांची वाडटी संख्या आनी बेगिनूच सुरू जावपी मोपा आंतरराष्ट्रीय विमानतळाक लागून गोंयाक दर दिसा सुमार 900 मेगावॅट विजेची गरज आसा.
पूण विमानतळ कार्यान्वीत जाले उपरांत थंय जायतीं आस्थापनां, प्रकल्प उबे रावतले. ताका लागून विमानतळ प्रशासना कडल्यान दरेक दिसा उण्यांत उणी 100 मेगावॅटची मागणी जावप शक्य आसा. वाडट्या पर्यटनाक लागून मे म्हयन्यां मेरेन विजेचे मागणेंत वाड जावन मे मेरेन वट्ट विजेची मागणी 900 मेगावॅट मेरेन पावपाक शकता, अशें तांणी नमूद केले.
‘तमनार’ प्रकल्पांतल्यान उण्या दरान वीज दिल्यार फायदो
उण्या दरान वीज खरेदी करून ती गोंयकारांक आनी उद्देगीक वसणुकेक पावोवपाचे यत्न वीज खात्यान सुरू केल्यात. सध्या उद्देगीक कंपनींक दिवपी अतिरिक्त वीज उक्त्या बाजारांतल्यान दर युनीट 6 ते 12 रुपया मेरेन दरान घेतात. फुडल्या काळांत ‘तमनार’ वीज प्रकल्पांतल्यान दर युनीट 3.26 रुपया दरान वीज दिल्यार ताचो निश्चीत फायदो जातलो, अशेंय वीज मंत्री सुदिन ढवळीकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
