भांगरभूंय | प्रतिनिधी
3 कोटी रुपयांचो खर्च; 6 म्हयन्यां भितर काम पुराय
आमदार शेट्ये हस्तुकीं बसयलो नवीं वीज यंत्रणांच्या कामाचो बुन्यादी फातर
दिवचल: फाटल्या 50 वर्सां सावन कळमेल्लीं दिवचल वीज उप केंद्राचीं लायटीचीं यंत्रणां नवी घालून तीं कार्यरत करतलीं. ताका लागून वचपी लायटीची समस्या पयस जातली. तशेंच साळ, मेणकुरें, दिवचल शार वाठार आनी हेर सुवातांचेर जमनी पोंदच्यान लायटीच्यो सरयो घालून वीज पुरवण सुरळीत करतले, अशें दिवचलचे आमदार डॉ. चंद्रकांत शेट्ये हांणी सांगलें.
दिवचल वीज केंद्राच्या वाठारांत आशिल्ली खूबशीं आदलीं सर्किट्स तशेंच वीज यंत्रणां नवीं घालतले. ह्या कामाक 3 कोटी रुपयांचो खर्च येतलो. हें काम 6 म्हयन्यांनी पुराय करतले, अशी म्हायती आमदार शेट्ये हांणी दिली.
ह्या वेळार नगराध्यक्ष कुंदन फळारी, कार्यकारी अभियंते वल्लभ सामंत, नगरसेवक सतीश गांवकार, दीपा शिरगांवकार, निलेश टोपले, रियाज बेग, रंजना वायंगणकार, विजयकुमार नाटेकार, गुंजन कोरगांवकार, अधिकारी कर्मचारी हाजीर आशिल्ले.
अभियंते सामंत हांणी, दिवचल वीज केंद्रांत आशिल्लीं लायटीचीं यंत्रणां पोरणीं जाल्ल्यान तांकां कळम आयल्या. हांगा नवीं यंत्रणां बसयल्या उपरांत वीज पुरवण सुरळीत जातली. तशेंच हेर सगळीं कामांय हातांत घेतले अशें तांणी सांगलें.
सतीश गांवकार हांणी दिवचल वीज अधिकारी, कर्मचारी खूब बरे तरेन सहकार्य दिल्ल्याचें सांगलें.
ह्या वेळार डॉ. शेट्ये आनी मानेस्तां हस्तुकीं बुन्यादी फातर बसयलो. येवपी स म्हयन्यांनी हें काम पुराय जातलें अशें ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
