भांगरभूंय | प्रतिनिधी
भांगरभूंय । प्रतिनिधी
हरमलः मांद्रे हांगच्या उदरगती विणे आशिल्ल्या मांद्रे खेळां मैदानाचो केंद्रीय निधींतल्यान सुमार 50 कोटी रुपया खर्च करून उदरगत करून थंय खेळगड्यांक जायत्यो सुविधा मेळोवन दितले अशें मांद्रेचो आमदार आनी गोंय हावसींग बोर्डाचे अध्यक्ष जीत आरोलकारान जाहीर केलें
मधलामाज मांद्रे हांगच्या हनुमान देवळाच्या दुसऱ्या वर्धापन दीस कार्यावळीत ते उलयताले. मांद्रे खेळां मैदानार तयार केल्ल्या स्विमींग पुलां खातीर पुराय वेळ प्रशिक्षकाची तजवीज केल्या. स्विमींगांत करिअर करपाक सोदपी भुरग्यांक थंय फावो तें प्रशिक्षण दितले. शिवाय क्रिकेट, फुटबॉल आनी अॅथेलेटिक सुविधां तयार करतले. शिवाय बॅडमिंटन, टेबल टॅनीस कोर्टाचो आसपाव आसतलो अशें आरोलकारान सांगलें.
मांद्रें मैदानाचो ताबो खेळां प्राधिकरण वा खेळा खात्या कडेन दिवचे परस तो मांद्रे पंचायती कडेन दिवपाचो आपलो आग्रो आसतलो. पंचायतीन म्हणल्यार गांवच्या लोकांनी मैदान सांबाळून दवोरपाक जाय अशें आपलें मत आसा. खेळगड्यां खातीर आपूण आनी आपली उदरगत संस्था यत्न करता अशेंय ताणे सांगलें. मांद्रें मतदारसंघातली वीज पुरवणेची समस्या सुटावी करपा खातीर देड- दोन म्हयन्यात सब स्टेशनाचे काम पुराय जातले अशी म्हायती ताणे दिली.
———————————————————————-
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
