भांगरभूंय | प्रतिनिधी
गे ल्लो कांय तेंप, हांव खूब फावटीं वाचतां की अमक्या लेखिकेच्या वा लेखकाच्या पुस्तकाचें प्रकाशन हें तांचें 38 वें वा 40 वें वा 42 वें पुस्तक. म्हाका अजाप जाता हांचीं इतलीं पुस्तकां केन्ना छापून आयल्यांत? म्हाका कांयच लक्षांत येना. हरशी हांव मडगांव वा पणजे वा कुडचड्यार जातल्या दरेक पुस्तक प्रकाशनाच्या सुवाळ्यात वतालोंच आनी पुस्तक विकतें घेतालों. दुसऱ्याय प्रकाशनांच्यो बातम्यो हांव वर्तमानपत्रार वाचून नोंद घेतालों. कोविडाच्या काळांत वचप जें बंद जालें तें बंदच उरलें. आतां बशींत पावल दवरपाक धैर्य जायना.
विचार करतां मळ्यार म्हाका आनीक एक गजाल येवजली. भाई मावज्या विशीं. ताणें खंय तरी बरयिल्लें जायत वा खंय तरी उलयिल्लो जायत की ताचीं णवूच पुस्तकां प्रकाशीत जाल्यांत. ताचे उपरांत आनीक दोन- तीन पुस्तकांची बी वाड जाल्या जायत! खंय साहित्य अकादमीचो 1983 वर्षा पुरस्कार मेळिल्ल्या आनी ज्ञानपीठ पुरस्कार लाबिल्या भाई मावजोचीं अकरा काय बारां पुस्तकां आनी खंय बाकिच्यांचीं 38 वा 40 वा 42 पुस्तकां!
ह्या बाकिच्यांचे थोडे चड कथासंग्रह हांवें वाचल्यात आनी म्हाकां तरी अशें दिसून आयलां की हे बाकीचे बरोवपी सेगीत कथा बरयताले आनी सोळा वा सतरा कथा जाल्यो रे जाल्यो काय थार नाशिल्ले भशेन त्यो पुस्तकाच्या रुपान छापून उडयताले. पासियेंस काडपाक तांकां वेळ नासतालो. हांच्या दरेक कथा संग्रहांतल्यो चार वा पांच कथा उत्कृश्ट आसताल्यो जाल्यार बाकीच्यो बऱ्यो. हांणी जर दरेक चार कथासंग्रहातल्यो उत्कृश्ट कथा घेवन एक पुस्तक छापिल्लें जाल्यार हांची पुस्तकां उणी आसतली आशिल्ली, पूण तांकां घडये साहित्य अकादमीचो पुरस्कार लेगीत मेळिल्लो आसूंक येतालो.
म्हाका भाई मावजो, मीना काकोडकार, महाबळेश्वर सैल, जयंती नायक हांच्यो पोरण्यो कथा विचार केल्यार आयज लेगीत अंधूक अंधूक शो येवजतात. पूण, चाळीस, बेचाळीस पुस्तकां छापिल्ल्यांचें कांयच येवजना. तांणी ताकतीक करून आपल्या पायांचेर कुराड मारून घेतल्या. म्हाका आनीक दोन लेखकांच्यो पोरण्यो कथा याद जातात. पूण तांच्या कथांचो केन्नाच व्हडलो भोवमान जालोना. कित्याक म्हूण खबर ना. घडये तांची दोन- दोनूच पुस्तकां छापून आयल्यात म्हूण जायत वा कथा कशो बरोवच्यो ह्या नेमांत तांच्यो कथा पडनात म्हूण जायत. म्हाका नेम बीम कांय लागना. खंयचेय कथेन
काळजाक स्पर्श केलो वा
दोळ्यांत दूक हाडलें की म्हजे हिसपान ती एक उत्कृश्ट कथा. ते दोनूय लेखक म्हळ्यार गुरुदास पै आनी दुसरो भटकळचो पद्मनाथ नायक.
हांव चाळीस, बेचाळीस पुस्तकां छापिल्ल्यांक कांयच सांगूंक सोदिना, पूण हांव तांकां कितें कळोवंक सोदतां हें तांकां समजलें आसतलें!
अरविंद काकोडकार
वास्को
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
