भांगरभूंय | प्रतिनिधी
समुपदेशनाचो उणाव, म्हत्व कळप ना हीच मुखेल कारणां
भांगरभूंय I सिद्धार्थ कांबळे
पणजी : गोंयांतल्यो 30 ते 40 टक्के आवयो बाळकांक आंगा वयलें दूद दिनात, अशें सर्वेक्षणांतल्यान दिसून आयला. ताका लागुनूच बळकांचें उणें वजन, अशक्तपणा, गिड्डेंपण तशेंच कुपोशण सारक्यो समस्या वाडत चल्ल्यात, अशी म्हायती राज्य कुटुंब कल्याण विभागाचे मुख्य वैजकी अधिकारी डॉ. राजेंद्र बोरकार हांणी आमच्या प्रतिनिधी कडेन उलयतना दिली.
आवयां कडल्यान बाळकांक आंगा वयलें दूद दिवप ना हाची जायतीं कारणां आसात. सध्या धांवपळीच्या जगांत जायत्यो बायलो नोकरी करतात. दीसभराच्या व्यस्त वेळापत्रकाक लागून तांकां भुरग्यांक आंगा वयलें दूद दिवप शक्य जायना. जाल्यार कांय आवयांक आंगा वयल्या दूदाचें म्हत्व खबर ना वा तांचे मदीं समुपदेशनाचो उणाव आसता. तशेंच कांय कुटुंबा कडल्यान तांकां हे खातीरचे सहकार्य मेळना, अशीय कांय कारणां मुखार आयल्यात, अशें डॉ. बोरकार हांणी म्हणलें.
बाळक जल्माक आयले उपरांत ताका एका वरा उपरांत बेगोबेग आवयचें दूद मेळप भोव गरजेचें. फुडले स म्हयने बाळकाक फक्त आवयचें दूद गरजेचें. तेच ताचे खातीर सगल्यांत व्हड वखद. पूण कांय आवयांक हाचें म्हत्व कळना. हाका लागून फुडारांत बाळकां मदीं जायत्यो समस्या निर्माण जातात, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
