भांगरभूंय | प्रतिनिधी
पुलाची दुरुस्ती करपाची थळाव्यांची मागणी
1634 वर्सा बांदिल्लो पुर्तुगेजांनी; त्या काळांत आशियांतलो सगल्यांत व्हड पूल
पणजी: 388 वर्सां पोरणो रायबंदरचो पाटो पूल सकयले वटेन खचलो. सद्या हो पूल एके वटेन येरादारी खातीर बंद दवरला. ही घडणूक जावचे पयली पुलाची दुरुस्ती करची अशी मागणी थळाव्यां कडल्यान जाताली.
फाटल्या कांय वर्सां सावन हो मार्ग घातक थारला. ह्या पुला वयल्यान अवजड वाहनांक वचपाक बंदी आसा. तशेंच वराची गती 40 किमि प्रतिवर इतली मर्यादीत आसा. पूण नेमांक पाळो कोणूच दिनात. दर कांय दिसांनी हांगा अपघात घडत आसतात. ह्या मार्गार खूबशा दुचाकी चालकांनी आपले जीव व्हगडायल्यात. तरी लेगीत हे घडणुके कडेन गंभीरतायेन कोणूच पळयनात.
मदेकांत एकदां स म्हयने पूल बंद दवरिल्लो. पूण उपरांत परतून नेम खुंटयाळाक लावन लोक गतीन वाहनां चलयतात अशें थळावे नागरीक नितीन नास्नोडकार हांणी सांगलें.
388 वर्सांचो हो पोरणो पूण सद्या येरादारी खातीर घातक थारला. दुरुस्ती केली ना जाल्यार व्हड दुर्घटणा जावप न्हयकारूं येना. ताका लागून जाता तितले बेगीन दुरुस्तीचें काम हातांत घेवचें अशी मागणी नास्नोडकार हांणी केल्या.
2017 वर्सा हो पूल अवजड वाहनां खातीर पुरायपणान बंद दवरिल्ल्याचें भौशीक बांदकाम विभागाचे मुखेल अभियंते उत्तम पार्सेकार हांणी सांगिल्लें. पूण हलक्या वाहनां खातीर पूल उक्तो दवरिल्लो.
2014 वर्सा तेन्नाचे मुख्यमंत्री सर्गेस्त मनोहर पर्रीकार हांणी ह्या पुलाक पर्याय म्हूण एक समांतर पूल बांदपा विशीं सांगिल्लें. तशेंच हो पूल चलून वचप्यांक आनी सायकल चलोवप्यांक उक्तो दवरपा विशीं सांगिल्लें. जाल्यार भौशीक बांदकाम विभागान गोंयांतली इतिहासीक सुवात म्हूण सोबितीकरण करपाचें नियोजन केल्लें. पूण उपरांत ह्या प्रकल्पाचेर कांयच उलोवणें जालें ना. मजगतीं, पोरणें गोंया बायपास जाल्ल्यान ह्या पुला वयली येरादारी उणीं जाल्ल्याचें सांगतात.
हो पूल पुर्तुगेज राजवटीत 1634 वर्सा घोड्याचे गाडयेंतल्यान म्हालाची येरादारी करपा खातीर बांदिल्लो. त्या काळांत हो आशियांतलो सगल्यांत व्हड पूल म्हूण वळखताले. भारतांतल्या कांय पोरण्या पुलां मदलो हो एक आसा. पूण गतीन तशेंच अवजड वाहनांचे येरादारीक लागून पुलाची अवस्था बिकट जाल्या. जून 2014 वर्सा पुला वयल्या 50 मिटराच्या रस्त्याक वेंर गेल्ली ती भौशीक बांदकाम खात्यान दुरुस्त केल्ली. पूण कांय दिसां उपरांतूच परतून थंय वेंरो पडल्यो.
गोंयांतलें एक म्हत्वाचें बांदकाम आशिल्ल्या ह्या पुलाची दुरुस्ती करप गरजेची आसा. पूण ह्या जीर्ण जाल्ल्या पुला कडेन सरकारान फाटूच दाखयिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
