भांगरभूंय | प्रतिनिधी
मुख्यमंत्र्यांचें आस्वासन, आदले तारखे प्रमाण महोत्सव करपाची मागणी
म्हापशें, प्रतिनिधी ः वागातोरा 31 डिसेंबराक सनबर्न महोत्सव जावचो ना अशें आस्वासन मुख्यमंत्री डॉ. प्रमोद सावंत हांणी दिलां, अशी म्हायती आमदार डिलायला लोबो हांणी पत्रकार परिशदेत दिल्या.
वागातोरा 31 डिसेंबराक सनबर्नाचें आयोजन केलां. पूण ही तारीख महोत्सवाक योग्य नाशिल्ल्यान थळाव्या लोकांनी विरोध केला. ही गजाल मुख्यमंत्र्याक सांगल्या उपरांत त्या दिसा सनबर्न जावचे ना अशें आस्वासन तांणी दिला अशें आमदार डिलायला लोबो हांणी सांगलें.
अंदूं 28 ते 31 डिसेंबर मेरेन चार दिसांच्या काळांत सनबर्न महोत्सव घडोवन हाडपाचें आयोजकांनी थारायलां. वागातोरा – हणजूणांतल्या कांय थळाव्या लोकांनी आनी रेस्टॉरंट वेवसायिकांनी ह्या महोत्सवाच्या 31 डिसेंबराच्या तारखेक विरोध करुन ही गाजाल थळावी आमदार डिलायला लोबो हांका सांगली. हाचे विशीं लोबो हांणी मुख्यमंत्र्या कडेन चर्चा केली.
सनबर्नाच्या नव्या तारखेच्या विरोधात हांव आसा. कारण आमी क्रिस्तांव समाजांतले लोक 31 डिसेंबराक मध्यान रातीं प्रार्थनेक (मिसाक) चर्चींत वतात. तशेंच थळाव्या रेस्टॉरंटांचोय ह्या दिसा व्हडलो वेवसाय जाता. त्या दिसा हो महोत्सव जालो जाल्यार थळाव्या लोकांक तशेंच रेस्टॉरंट मालकांकय समस्या निर्माण जातली अशें आमदार लोबोन त्या वेळार सांगिल्लें. आदले तारखे प्रमाण हो उत्सव तीन दीस जावचो अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
