भांगरभूंय | प्रतिनिधी
पणजीः आदिवासी समुदायांतल्या चलयांक फुडाराचे शिक्षण घेवपा खातीर उर्बा दिवपी विद्या लक्ष्मी येवजणेचो 3 हजारा परस चड अादिवासी चलयांनी लाव घेतला आनी सरकारान 9. 62 कोटी इतलो निधी हे येवजणेचेर खर्च केला. धावी पास जाले चलयेच्या बँक खात्यात रु. 25 हजार मेरेनचे फिक्स डिपोझीट सरकार हे येवजणे सकयल दिता, अशी म्हायती आदिवासी कल्याण संचालनालयान दिल्या.
आदिवासी समुदायतल्या चलयां मदीं शिक्षणा खातीर उर्बा दिवन ह्या समुदायांतल्या अर्थीक दुर्बळ आशिल्ल्या घटकांक मजत दिवप हे येवजणेचो हेत आसा.
चली धावी पास जाले उपरांत खातें रु. 25 हजार इतलो निधी लावार्थ्यांच्या बँक खात्यांत फिक्स डिपझीट म्हण जमा करता. चली 12वी वा ते फुडले शिक्षण घेवन पास जाले उपरांत हे पयशे लावार्थ्यांक मेळटात. तांणी बारावेची परिक्षा तीन यत्ना भितर पास जावपाक जाय वा दोन वर्सा भितर पयलो यत्न पास जावपाक जाय जाल्यारच हो लाव मेळटलो, ना जाल्यार हो मंजुर केल्लो निधी सरकार जप्त करून परत सरकारी तिजोरेंत जमा करतले. जर लावार्थी मदीच शिक्षण सोडटा जाल्यारय हो निधी जप्त जातलो.
हे येवजणेचो फाटल्या पांच वर्सात 3,856 आदिवासी चली विद्यार्थ्यांनी लाव घेतला आनी सरकारान ह्या लावार्थ्यांक 9.62 कोटी मेरेन लाव दिला. फाटल्या पांच वर्साचो नियाळ घेतल्यात अंदूं लाबार्थ्यात मात्सो उणाव जाल्लो दिश्टी पडटा. फाटल्या चार वर्सात 700 परस चड लावार्थ्यांनी हे येवजणेचो लाव घेतिल्लो आनी अंदूं फकत 600 मेेरेन विद्यार्थ्यांनी हे येवजणेचो लाव घेतला.
चलयेन धावी परिक्षा पास करपाक जाय आनी जेन्ना ती चली इकरावी यत्तेत विज्ञान, कला, वाणीज्य, वेवसायीक, आयटीआय फांट्यात प्रवेश मेळयतली तेन्नाची ती हे येवजणे खातीर पात्र थारतली. तशेंच लावार्थी चलयेच्या फामिलीची वर्सुकीं येणावळ रु. 3 लाखा परस चड आसपाक जायना. हे येवजणे खातीर इत्सूक चलयेन आपल्या सबंदीत शिक्षणीक संस्थेतल्यान अर्ज करचो, अशी म्हायती संचलनालयान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
