भांगरभूंय | प्रतिनिधी
नव्या शिक्षण धोरणा प्रमाण शिक्षण खात्याचें परिपत्रक
भांगरभूंय I प्रतिनिधी
पणजी : आतां पयले यत्तेंत 6 वर्सां उपरांत जाल्यार नर्सरींत 3 वर्सां उपरांत प्रवेश मेळटलो. नव्या शिक्षण धोरणा प्रमाण शिक्षण खात्यान प्रवेशाची पिराय स्पश्ट करपी परिपत्रक जारी केलां.
येत्या शिक्षणीक वर्सा नर्सरी प्रवेशा खातीर 3 वर्सां पिरायेची अट लागू जातली. 2025 – 26 ह्या शिक्षणीक वर्सा सावन पयलीच्या प्रवेशा खातीर 6 वर्सां पिरायेची अट लागू जातली. 2021 -2022 वर्सा जांणी नर्सरींत प्रवेश घेतला तांकां पयलीच्या प्रवेशा खातीर 6 वर्सांची अट लागू जावची ना.
गोंया सयत पुराय देशांत नव्या शिक्षणीक धोरणाची टप्प्याटप्यान कार्यवाही सुरू जाल्या. नव्या शिक्षणीक धोरणाची कार्यवाही नर्सरी सावन सुरू जातली, अशें गोंय सरकारान पयलीच स्पश्ट केलां. शिक्षण हक्क कायद्याची कार्यवाही 2009 वर्सा सावन सुरू जाली. दोन वर्सां पयलीं केंद्र सरकारान नवें शिक्षण धोरण तयार केलें. नर्सरी तशेंच पयलीच्या प्रवेशा खातीर सगल्या राज्यां खातीर समान पिराय आसप गरजेचें. सगल्या राज्यांनी नर्सरी प्रवेश 3 वर्सांचो केलो जाल्यार पयलीचो प्रवेश 6 वर्सां पुराय जाले उपरांत जातलो. हाका लागून गोंयांत शिक्षण खात्यान प्रवेशाची पिराय स्पश्ट करपी परिपत्रक जारी केलां.
2025 – 26 वर्सा सावन 1 जून मेरेन जांकां 6 वर्सा पुराय जाल्यात, त्या भुरग्यांक पयलीत प्रवेश मेळटलो. 2023 – 2024 वर्सा सावन 1 जून मेरेन 3 वर्सां पुराय जाल्ल्या भुरग्यांक नर्सरींत प्रवेश मेळटलो. सध्या नर्सरींत प्रवेश घेतिल्या विद्यार्थ्यांक ह्या निर्णयाचो फटको बसचो ना, हाची जतनाय घेतल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
