भांगरभूंय | प्रतिनिधी
घरकान्न म्हणटा, ‘ऑपरेशन सिंदूर’ खातीर हांव म्हजो ‘सिंदूर’ धाडटा
जळगांव, खबरां संस्थाः भारत आनी पाकिस्तान हांचे मदीं वाडत आशिल्लो तणाव पळोवन लश्करी कर्मचाऱ्यांक सुटी रद्द करून बेगोबेग ड्युटेचेर हजर रावपाचे आदेश दिलें. हातूंत 3 दिसां पयलीं लग्न जाल्लो जळगांव जिल्ल्यांतल्या पाचोरा तालुक्यांतलो मनोज पाटीलूय आसा. ताणें देशाची सेवा करपा खातीर रोखडोच ड्युटीचेर हजर रावपाचो निर्णय घेतलो.
मनोजाचें लग्न 5 मे दिसा जालें, लग्न जाले उपरांत दोन दिसांत भारत- पाकिस्तानांतल्या तणावाक लागून सगळ्या सैनिकांचीं सुटी रद्द करून तांकां रोखडेंच ड्युटेचेर रिपोर्ट करपाचो आदेश दिलो.
मेळिल्ले म्हायती प्रमाण, नाचण खेडेचो रामचंद्र पाटील हांची धूव यामिनीचें लग्न ज्ञानेश्वर पाटील हांचो पूत मनोज हाचे कडेन जालें. मनोज लग्नाक सुटी घेवन गांवांत आयिल्लो. मजगतीं भारत आनी पाकिस्तान हांचे मदीं तणाव वाडलो. खंयच्याय खिणाक झुजा सारकी परिस्थिती निर्माण जावंक शकता. हाका लागून लग्न जाताच दोन दिसांनी मनोजाक ड्युटीचेर आपयलो.
देशसेवेची सोंपूत घेतिल्ल्या मनोजान आपले घरकान्नीक रोखडोच परत येतलो अशें आश्वासन दिवन शिमेचेर ड्युटीक वचपाचे थारायलें. स्टेशनाचेर ताका निरोप दिवपाक आयिल्ले कुटुंबांतले लोक भावनीक जाल्लें. हे घडणुकेचो व्हिडियो सध्या सोशल मिडियाचेर व्हायरल जावपाक लागला. मनोजाच्या ह्या धाडसी निर्णया खातीर सगळे कडेन ताची तोखणाय जाता. पाकिस्तानाक काबार करून परत यो, जैतिवंत जा, अश्यो शुभेत्सा ताका लोकांनी दिल्यात.
मजगतीं, कुटुंबा वांगडा लग्नाची खोस मनयतना मनोजान देश सेवेक प्राधान्य दिलें ही अभिमानाची गजाल अशें मनोजाच्या बापायन सांगलें. हे कठीण परिस्थितींत देशा परस व्हडलें कांयच ना, आनी देशाची सेवा करप हें पयलें प्राधान्य आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
