भांगरभूंय | प्रतिनिधी
डॉ. नंदकुमार कामतः गांधी जयंती दिसा ग्रामसभांनी जातली शेती धोरणाचेर चर्चा
भांगरभूंय । प्रतिनिधी
पणजी : राज्याचें शेती धोरण तयार करपाची प्रक्रिया सुरू जाल्या. प्रजासत्ताक दिसाच्या आदल्या दिसा म्हणल्यार 25 जानेवारीक शेती धोरण तयार करपाचे यत्न आसात. लोकांच्या सुचोवण्यां खातीर गांधी जयंती दिसा सगळ्या ग्रामसभांनी शेती धोरणाचेर चर्चा जातली. हे विशींचें पत्र शेतकी मंत्री सरपंचांक बरोवपाचे आसात. शेतकार, लोकप्रतिनिधी तशेंच तज्ञांच्यो सुचोवण्यो विचारांत घेवन शेती धोरण तयार जातलें. प्रजासत्ताक दिसा मेरेन धोरण तयार जातलें, अशी म्हायती धोरण समितीचे अध्यक्ष डॉ. नंदकुमार कामत हांणी दिली.
शेती मंत्री रवी नायक हांच्या फुडारपणा खाला बसका जाली. डॉ. नंदकुमार कामत, आदले मंत्री प्रकाश वेळीप, आमदार विजय सरदेसाय, शेतकी खात्याचे संचालक नेवील आफोन्सो, शेतकी खात्याचे आदले संचालक बसकेक हाजीर आशिल्ले. शेती धोरण तयार करपा खातीर 5 उपसमित्यो स्थापन जाल्यात. दूद उत्पादन, नुस्तेमारी ह्या घटकांचो आस्पाव शेती धोरणांत आसतलो. आतां मेरेन लोकां कडल्यान 746 सुचोवण्यो आयल्यात. सगळ्यो सुचोवण्यो विचार करपा सारक्यो आसात, अशें डॉ. नंदकुमार कामत हांणी बसके उपरांत सांगलें.
शेतकारांक लाव जावचो आनी शेतीचें प्रमाण वाडचें, ह्या हेतान शेती धोरण तयार जातलें. शेतकार तशेंच लोकप्रतिनिधींक विस्वासांत घेवन हें धोरण तयार जातलें. बसकेंत शेती धोरणाचेर चर्चा जाली, अशें बसके उपरांत शेती मंत्री रवी नायक हांणी सांगलें.
शेती धोरण तयार करपाचो वावर 2012 त सुरू जाल्लो. साबार कारणांक लागून धोरण तयार जालें ना, अशें डॉ. कामत हांणी सांगलें.
दरेका म्हालांनी ओपन फोरम
शेती धोरणाचेर सगळ्या पंचायतींच्या ग्रामसभांनी चर्चा जातली. गांधी जयंती दिसा म्हणल्यार 2 ऑक्टोबराक ग्रामसभांनी चर्चा जावची, अशें पत्र मंत्री बरयतले. तशेंच दरेका म्हालांत ओपन फोरमाचें आयोजन जातलें. ओपन फोरमांत मतां मांडपाची संद आसतली. ग्रामसभा तशेंच ओपन फोरमांत चर्चा जाले उपरांत मसुद्याचें काम सुरू जातलें, अशें डॉ. नंदकुमार कामत हांणी सांगलें.
तेलंगण, ओरिसा ह्या राज्यांनी शेती धोरण तयार केलां. हेर राज्यांच्या शेती धोरणाचो अभ्यास करतले. धोरण तयार करपा खातीर 5 उपसमित्यांची स्थापना जातली. शेती धोरणांत 25 ते 30 महत्वाचे मुद्दे आमी काडल्यात. हवामान आनी कामगारांचो दीसवडो वाडिल्ल्यान शेती करप सध्या परवडना. शेती सांबाळून तातूंल्यान रोजगार तयार करपाचेर धोरणांत भर आसतलो, अशें डॉ. नंदकुमार कामत हांणी सांगलें.
कूळ मुंडकार कायद्याची कार्यवाय
कूळ मुंडकार कायद्याची कार्यवाही करपाचो निर्णय सरकारान घेतला. कूळ मुंडकार कायद्याची कार्यवाही करपाची जापसालदारकी येणावळ खात्याची आसा. येणावळ खात्याच्या अधिकाऱ्यां सयत बसका जातली. फुडली बसका चवथी उपरांत जातली. फुडले बसकेंत येणावळ खात्याच्या अधिकाऱ्यांक आपयतले, अशें मंत्री रवी नायक हांणी सांगलें.
विजय सरदेसाय हांच्यो म्हत्वाच्यो सुचोवण्यो
शेती धोरण पक्ष तशेंच राजकारण विरयत आसतले. विरोधी पक्षाचो आमदार आसून लेगीत विजय सरदेसाय हांणी बसकेक हाजीर रावून म्हत्वाच्यो सुचोवण्यो केल्यो. सेंद्रीय शेती तशेंच सैमीक शेतीचेर सरदेसाय हांचो अभ्यास आसा. तांच्यो सुचोवण्यो मोलादीक आशिल्ल्यो, अशें डॉ. नंदकुमार कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
