भांगरभूंय | प्रतिनिधी
पणजी: गोंयांत 1 जानेवारी 2020 ते जुलय 2022 मेरेन वट्ट 221 फावटी नुस्तेमारी खात्या वतीन बेकायदो नुस्तेमारी करतना नुस्तेमारांक धरल्यात, अशी म्हायती नुस्तेमारी मंत्री नीळकंठ हळर्णकार हांणी अतारांकीत प्रस्नाचे लेखी जापेंत दिल्या. आमदार एल्टन डिकॉस्टा हांणी हो लेखी प्रस्न मांडिल्लो.
गोंयांत फाटल्या अडेज वर्सांत वट्ट 221 फावटी बेकायदो पद्दतीन नुस्तेमारी करतनाची नोंद नुस्तेमार खात्या कडेन आसा. हातूंतलीं 197 प्रकरणां हीं चुकीचीं कागदपत्रां, कायद्याचें उल्लंघन तशेंच कोरोना नेमाक पाळो न दिवप, वळखपत्रां न दाखोवप तशेंच हवामान खात्याच्या सुचोवण्यांक पाळो न दिवप अशा कागाळींची नोंद आसा. जाल्यार 24 प्रकरणां ही कायद्यान बंदी आशिल्ली एलईडी वरवीं नुस्तेमारी करतना धरिल्ल्याचीं प्रकरणां आसात. हातूंतल्या कांय जाणांक दंड दिला जाल्यार कांय जाणांचो परवानो रद्द केला.
गोंयांत एलईडीन नुस्तेमारी करपाक बंदी आसा, पूण नुस्तमारी खात्याक फटोवन ही एलईडी नुस्तेमारी करतात. नुस्तेमारी खात्याची पळोवणे खातीर पेट्रोलिंगाची एक बोट आसा आनी पुलीस नुस्तेमार खात्याच्या निरिक्षकां वतीन ही पळोवणी करतात. बायोमेट्रीक कार्ड तशेंच आधारकार्ड दाखोवप गरजेचें आसा. कांय सुवातींनी अशीं वळखपत्रां दाखय नासतना बेकायदो नुस्तेमारी करतात. तांचेर कारवाय जाता. अशे तरेन फाटल्या अडेज वर्सांत 221 प्रकरणां नुस्तेमारी खात्या कडेन नोंद आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
