भांगरभूंय | प्रतिनिधी
पणजी : गोंयांतल्या अनुसूचीत जमातींक (एसटी) 2027 च्या विधानसभा वेंचणुकेंत निश्चीत राजकी आरक्षण मेळटलें. ते खातीर मुख्यमंत्री डॉ. प्रमोद सावंत हांच्या फुडारपणा खाला शिश्टमंडळ बेगिनूच केंद्रीय गृहमंत्री अमीत शाह हांची भेट घेतले, अशें सभापती रमेश तवडकार हांणी मंगळारा पत्रकारां कडेन उलयतना स्पश्ट केले.
एसटी समाजाच्याे कांय संघटणा एसटींक बेगोबेग विधानसभेंत आरक्षण दिवपाची मागणी करतात. पूण तांची मागणी बेगोबेग पुराय करप सरकाराक शक्य ना. 2027 च्या विधानसभा वेंचणुकेंत एसटी समुदायाक आरक्षण दिवपाची हमी मुख्यमंत्री डॉ. प्रमोद सावंत हांणी पयलींच दिल्या. तशेंच मुख्यमंत्र्यांच्या फुडारपणा खाला शिश्टमंडळ बेगिनूच हे विशीं गृहमंत्री अमीत शाह हांची भेट घेतले. ताका लागून एसटी समाजाच्या संघटणांनी सरकाराचेर खंयच्याच मार्गान चेपण हाडचे न्हय. तांची मागणी सरकार निश्चीत पुराय करतले, अशें तवडकार हांणी म्हणलें.
मजगतीं, कोमुनिदाद जमनींतली बेकायदो घरां कायदेशीर करपा विशीं राज्य सरकारान घेतिल्लो निर्णय योग्य आसा. जायते गोंयकार फाटल्या जायत्या वर्सां पसून कोमुनिदाद जमनीचेर घरां बांदून रावतात. काणकोणच्या आगोंद वाठारांत 60 टक्के घरां कोमुनिदाद जमनींत आसात. हे सगले नागरीक मूळ गोंयकार आसात. काणकोणांत कोमुनिदाद जमनींत आशिल्लीं 70 घरां पाडपाचे आदेश दिल्यात. अशें परिस्थितींत सरकारान घेतिल्ल्या निर्णयाचो जायत्या जाणांक फायदो मेळटलो, अशें तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
