भांगरभूंय | प्रतिनिधी
33 टक्के अस्तुरी राखीवता धोरण गोंयांवरी ल्हान राज्यांतल्यान चालीक लागूंक शकता. गोंय विधानसभा वेंचणूक 2027 ते नदरेन म्हत्वाची थारतली. गोंय प्रदेश काँग्रेसीन तीन अस्तुरी प्रदेशाध्यक्ष दिल्यो. त्या पक्षान 2024 वर्सा दक्षीण गोंय लोकसभा वेंचणुकेंत बीना शांताराम नायक हांकां उमेदवारी दिवन वेंचून हाडप शक्य आशिल्लें. तांकां उमेदवारी मेळ्ळी ना पूण प्रदेश काँग्रेसीच्या अस्तुरी फांट्या खातीर दक्षीणेंत काँग्रेसीच्या उमेदवाराक जैत मेळ्ळें. बिनाताई कडेन प्रदेश काँग्रेसीचें अध्यक्षपद आयल्यार पक्षाक शिस्त येतली. बिनाताई ह्यो एक अणभवी स्त्रीशक्त, तांच्या राजकी अणभवाचें बळगें फुडाराक उपेगी.
33 टक्के अस्तुरी राखीवतेचें धोरण शिस्तीन चालीक लागतलें जाल्यार ताचे बराबरीन ती राजकी पक्षांत येवचीच पडटली. राजकारणांत सत्तेर आशिल्लो राजकी पक्ष निमणे मेरेन आपली राजनिती हालीं लिपोवन दवरपाक लागला. देश आनी राज्य पावंड्यार राष्ट्रीय, प्रादेशीक पक्ष आदीं सावन एकठांय येतात, केन्ना पयसय वतात. म. गो., भाजपा युती गोंयांत पयलेफावट जाली ते वेळार म. गो. परस भाजपान मेकळेपणान वेगळोच राजकी खेळ मांडून चार आमदार वेंचून हाडले. बळगें वाडोवन मुखार वतना गोंय विधानसभेंत भाजपाच्यो तीन अस्तुरी लोकप्रतिनिधी आसात. आमदार जेनिफर मोन्सेरात तिसरे फावट विधानसभेर वेंचून येवपी, अणभवान ज्येश्ट. तांकां वेंचून हाडपाक तांचे घरकार येणावळ मंत्री आतानासियो (बाबुश) मोन्सेरात हांचो व्हड वांटो. घरकाराच्या वेंचणूक राजकारणांत वांटेकार जावन जेनिफर विधानसभे मेरेन पावल्यो, पक्षांतरांय जालीं. घरकारा वांगडा जेनिफर रावल्यो, पंचायत, जिल्लो पंचायत ते विधानसभा, मंत्री पदा मेरेन त्यो पावल्यो. घरकारा परस शिक्षणान कूसभर फुडें आशिल्ल्या जेनिफरबायन कांपाल परेड ग्रावंडा वयल्यो कोयराच्यो राशी ना करपाचो व्हड वावर केला. हेर अस्तुरे बराबर रावपी, आदल्यो मंत्री व्हिक्टोरिया (मामी) फर्नांडिस हांचे आड पयले फावट विधानसभा वेंचणुकेंत देंविल्ल्यो. अस्तुरे आड अस्तुरी वेंचणुकेंत आसता तेन्ना अस्तुरीनीत पाळची, वगीच तांचेर आरोप, वेंचणुकेंत आशिल्ल्या दादल्यांक वेंचून येवपाची संद नाका हीं म्हजीं उतरां तांकां कळ्ळीं. राबितो ताळगांवा, कुशीच्या सांताक्रूज मतदारसंघात वेंचणूक सोंपी नासता हें तांकांच न्हय तांचे घरकार बाबुशाकय कळ्ळें. उपरांतचे वेंचणुकेंत ताळगांवांतल्यान जेनिफर हांकां जिखून हाडलें. गोंय विधानसभेंत 15 वर्सां ताळगांव मतदारसंघाचें प्रतिनिधित्व करपी, तरी तो मतदारसंघ तांचे घरकार बाबुश हांचोच म्हणून आयजय वळखतात. तळागाळांतल्या राजकारणाची देख तांकां घरकारा कडल्यान मेळ्ळी. राखीवता नासतना गोंय विधानसभेर पावपी अस्तुरी म्हणून जेनिफर हांची वळख उरतली.
भलायकी मंत्री विश्वजीत राणे हांकां वेंचणुकेंत मजत करत आमदार देविया राणे विधानसभेंत पावल्यो राखीवते बगर. समेस्तां मदीं बसप, उठप करपाची तांक तांचे मदीं आसा. मतदारसंघाचे प्रस्न सुटावे करून घेवपाक, मतदारसंघांत नित्य क्रियाशिल रावपी देविया राज्याक बरें नेतृत्व फुडारांत दितल्यो अशी आस्त आसा. आयोजक, वेवस्थापक, संघटक आशिल्ल्यो आनी उच्च शिक्षण घेतिल्ल्यो देविया मतदारसंघाचें अर्थकारण बदलपा पासत वावुरतात. पर्ये मतदारसंघ तांचे अस्मितायेची कुरू जाता.
कळंगुटचे आमदार मायकल लोबो हांची घरकान्न शिवोलेची आमदार डिलायला लोबो घरकारा परस चड शिकिल्ल्यो. 2027 त शिवोली मतदारसंघ राखून दवरपापासत सर्त आसतली. घरकाराचो आदार आसलो तरी तांच्याय कळंगुट मतदारसंघांत सर्तीचें वारें आतां सावन व्हांवता. देविया, जेनिफर हांचे मुखार सर्त उणी आसा.
घराब्याचें राजकारण गोंय विधानसभेचे वेंचणुकेंत 2027 दिसतलें. अस्तुरी राखीवता चालीक लायतना घरकाराक घरकान्न, भयण, भावजेक, धुवेक राजकारणांत हाडपापासत आतां सावन तयारी करची पडटली. मुरगांव तालुक्यांत शमी साळकार वा श्रद्धा आमोणकार, मडगांव मतदारसंघातल्यान आशा कामत भाजपांतल्यान राखीव अस्तुरी आसत व्हय?
घरकारा परस शिक्षणान फुडें, बराबरीन आशिल्ल्यो सावित्री कवळेंकार, सविता तवडकार भाजपा कडेन आसात. मुख्यमंत्री डॉ. प्रमोद सावंत हांची घरकान्न सुलक्षणा सावंत, पल्लवी धेंपे राखीवते बगर वेंचणुकेंत आसपाची शक्यताय न्हयकारुंक येना. संजना वेळीप, जेनिता मडकयकार, सोनिया कुंकळ्ळकार हांकां घरकाराचो तेंको मेळटलो. संजना, जेनिता हांकां जिल्लो, पंचायत पावंड्या वयल्या राजकारणाचो अणभव आसा. सावित्री हांकां जिल्लो पावंड्यार राजकारणांत येवचें पडटलें.
अस्तुरेआड अस्तुरेचें झुज राजकारणांत राखीवतेंतल्यान विधानसभा वेंचणुकेंत पयलीं हाडप एक इतिहास आसतलो. सगल्या समाज, धर्मांच्या अस्तुरेक आसपावपी राजकारण अस्तुरी राखीवतेंत आसचें पडटलें. फोंड्यां तालुक्यांतल्या मतदारसंघांतल्यान विद्या गावडे, ब्राह्मीदेवी आयल्यार विधानसभेक बळगें मेळूंक शकता. पयलीं आपल्या मतदारसंघांचे समाजकारण जोखून राजकी पक्षाचो आलाशिरो मेळयलो तरी विधानसभे मेरेन पावपाचें राजकारण एक सर्कसच. गोंयची पयली मुख्यमंत्री शशिकलाताई काकोडकार, आदली वीजमंत्री निर्मला सावंत हांचें, राज्याचें त्या राजकारणांत लुकसाण जालां. फुडारांत तशें जावचें न्हय हे खातीर गोंयकांरांक सादूर रावचें पडटलें, जतनाय जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
