भांगरभूंय | प्रतिनिधी
नवी दिल्ली, खबरां संस्था ः आयच्या इंटरनॅट युगांत संवसारांत सगळ्योच गजाली सोंप्यो जाल्यात. मजगतीं, वेगवेगळ्या देशांतले ब्रँड संवसारीक बाजारांत आपली वेगळी वळख तयार करपाक लागल्यात. भारतीय ब्रँडूय संवसारीक पांवड्यार फामाद जावपाक लागल्यात.
ब्रँड फायनान्साच्या ताज्या अहवाला प्रमाण, टाटा ग्रुपान संवसारीक पांवड्यार भारताची सुवात वाडयल्या. ह्या अहवाला प्रमाण टाटा ग्रुपाचो ब्रँड व्हॅल्यू 31.6 अब्ज डॉलर आसा, जो 10 टक्क्यांनी वाडलां. हाचे वांगडाच 2025 वर्सा संवसारांतल्या पयल्या 100 मोलादीक ब्रँडां मदीं मुखेल भारतीय ब्रँड म्हणून आपली सुवात तिगोवन दवरल्या. संवसारीक पांवड्यार हो भारतीय ब्रँड 60वे सुवातेर आसा.
चड मोलादीक भारतीय ब्रँडांच्या वळेरेंत इन्फोसिसाचो दुसरो क्रमांक आसा. इन्फोसिसान सेगीत चवथ्या वर्सा संवसारीक पांवड्यार तिसरी मोलादीक आयटी सेवा ब्रँड म्हूण क्रमांक मेळयला.
विशेश म्हळ्यार, एलआयसी 2025 वर्सा सगळ्यांत नेटान वाडपी भारतीय ब्रँड म्हणून वयर सरलां. कारण 2025 वर्सा एलआयसीचो ब्रँड व्हॅल्यू 36 टक्क्यांनी वाडलां, जो आतां 13.3 अब्ज डॉलर मेरेन पावलां. तेच बरोबर एएए ब्रँड स्ट्रेंथ रेटिंगय तिगोवन दवरलां अशें अहवालांत म्हणलां.
एचडीएफसी ग्रुपान पयलेच खेपे हे वळेरेंत सुवात मेळयलां. ह्या ग्रुपाची ब्रँड व्हॅल्यू 14.2 अब्ज डॉलर आसा. लार्सन अँड टुब्रोची ब्रँड व्हॅल्यू 7.4 अब्ज डॉलर आसा. तशेंच जियो ग्रूपानूय 6.5 अब्ज डॉलर ब्रँड व्हॅल्यू सयत संवसारीक पांवड्यार आपली सुवात तिगोवन दवरलां.
संवसारीक ब्रँड व्हॅल्यू मार्केटांत अमेरीका आघाडीचेर आसा, वट्ट ब्रँड व्हॅल्यू मार्केटांतल्यान 52.9 टक्के वांटो अमेरिकेचो आसा. देखून संवसारांतले हेर देश हे सर्तींत खूब फाटीं आसात अशें दिसता. ब्रँड फायनान्स ग्लोबल 500, 2025 च्या मोलादीक ब्रँडां मदीं भारत 8वे सुवातेर आसा. वट्ट ब्रँड व्हॅल्यूत भारताचो वांटो 1.7 टक्के आसा. हाचे वयल्यान संवसारीक पांवड्यार भारतीय ब्रँडांचें वाडत वचपी म्हत्व स्पश्ट जाता.
ब्रँड फायनान्स अहवाल 2025 प्रमाण भारतांतल्या पयल्या 10 मोलादीक ब्रँडांची वळेरी अशीं – टाटा ग्रुप, इन्फोसिस, एचडीएफसी ग्रुप, एलआयसी, रिलायन्स ग्रुप, एसबीआय ग्रुप, एचसीएलटेक, एअरटेल, लार्सन अँड टुब्रो आनी महिंद्रा ग्रुप9.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
