भांगरभूंय | प्रतिनिधी
अभियांत्रिकी/फार्मसी प्रवेश जेईई परिक्षेचेर आदारीत
भांगरभूंय I प्रतिनिधी
पणजी : अभियांत्रिकी तशेंच फार्मसी पदवी अभ्यासक्रमा खातीरची जीसीईटी प्रवेश परिक्षा 2024-25 ह्या शिक्षणीक वर्सां पसून बंद जातली. आयआयटी प्रवेशा खातीर जावपी जेईई परिक्षेचेर आदारीत राज्यांत अभियांत्रिकी आनी फार्मसी पदवी अभ्यासक्रमा खातीर प्रवेश
जातलो.
2023-24 वर्साची जीसीईटी परिक्षा निमाणी आसतली. 2023 – 24 वर्सा खातीर अभियांत्रिकी आनी फार्मसी पदवी अभ्यासक्रमा खातीर जीसीईटीचेर आदारीत प्रवेश दितले. हाचे उपरांत जीसीईटी परिक्षा बंद जातली. सध्या आयआयटी प्रवेशा खातीर जॉयंट एंट्रास एक्झाम (जेईई) परिक्षेचेर आदारीत प्रवेश दितात. गोंयांत लेगीत हे परिक्षेचेर आदारीत प्रवेश प्रक्रिया जातली. अभियांत्रिकी क्षेत्रांत ज्या विद्यार्थ्यांक आयआयटींत प्रवेश मेळना, ते विद्यार्थी राज्यांतल्या अभियांत्रिकी म्हाविद्यालयांत प्रवेश घेतात. हाका लागून चडश्या विद्यार्थ्यांक जेईई सयत जीसीईटी परिक्षेक बसचे पडटा. विद्यार्थ्यां वयलो ताण वाडटा. हे निर्णयाक लागून अभियांत्रिकी फांट्यांत प्रवेश घेवपाक इत्सूक आशिल्ल्या विद्यार्थ्यां वयलो ताण उणो जातलो.
सर्वोच्च न्यायालयाच्या निर्णया उपरांत 2005 वर्सा जीसीईटी परिक्षा सुरू जाल्ली. पयलीं वैजकी, दंत, अभियांत्रिकी, फार्मसी, होमीओपथी ह्या सगल्या अभ्यासक्रमां खातीर जीसीईटी परिक्षेचेर आदारीत प्रवेश दिताले. दोन वर्सां पयलीं वैजकी प्रवेशा खातीर सर्वोच्च न्यायालयान नीट परिक्षा सक्तीची केल्या. हाका लागून वैजकी, होमिओपथी अभ्यासक्रमाचो प्रवेश नीट परिक्षेच्या गुणांचेर जावपाक लागलो. फक्त अभियांत्रिकी आनी फार्मसी प्रवेशा खातीर जीसीईटी परिक्षा दिवपाची पडटाली. बिट्स पिलानी संस्थेत बिट सॅट हे परिक्षेचे आदाराचेर प्रवेश प्रक्रिया जाता. 2005 वर्सा पयलीं बारावेच्या गुणांच्या आदारान वैजकी, दंत, अभियांत्रिकी फांट्यांत प्रवेश दिताले. वेगळी प्रवेश परिक्षा नाशिल्ली.
आनीक दोन वर्सांनी वैजकी प्रवेश नीट परिक्षेच्या गुणांचेर जाल्यार अभियांत्रिकी प्रवेश जेईई परिक्षेतल्या गुणांचेर जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
