उत्तराखंडांत बर्फाचो खंड कोसळ्ळो

उत्तराखंडांत बर्फाचो खंड कोसळ्ळो

चामोली जिल्ह्यांतली भिरांकूळ घडणूक
धौलीगंगेच्या हुंवारांत सुमार 173 जाणांक मरण
ऋषीगंगा उर्जा प्रकल्पाचें मोटें लुकसाण
मरण आयिल्ल्यांच्या कुटुंबांक चार लाखांची मजत: मुख्यमंत्री

डेहराडून: उत्तराखंडाच्या चामोली जिल्ह्यांतल्या जोशीमठ वाठारांत काल (आयतारा) सकाळीं इकरा वरांच्या सुमाराक नंदोवी न्हंये कुशीचो महाकाय बर्फाळ खंड कोसळ्ळो. ताका लागून धौलीगंगा न्हंयेक हुंवार आयला आनी ताच्या प्रवाहांत पर्वत वाठाराचें सुमारा भायर लुकसाण जालां. सुमार 173 जाणांक हुंवारांत मरण आयिल्ल्याचो दुबाव थळाव्या सरकारान उक्तायला. आतां मेरेन 15 लोकांच्यो कुडी भायर काडल्यात. तपोवन-रेणी हांगासरली ऋषीगंगा उर्जा प्रकल्पाचे हे घडणुकेंत व्हड प्रमाणांत लुकसाण जालां. राष्ट्रपती रामनाथ कोविंद, प्रधानमंत्री नरेंद्र मोदी, केंद्रीय गृह मंत्री अमीत शाह हांणी हे घडणुकेचेर खर दुख्ख उक्तायलां आनी उत्तराखंड सरकाराक ह्या भिशण सैमीक आपत्तीक गरजेची ती सगली मजत करपाचें उतर दिलां.
उत्तराखंडाचे महासचीव ओमप्रकाश हांणी सांगलें की, दुर्घटणेंत सुमार 173 जाणांक मरण आयिल्ल्याची शक्यताय आसा. चामोलीच्या तपोवन वाठारांत जाल्ले हे घडणुकेंत ऋषीगंगा पॉवर प्रॉजेक्टाचें व्हड प्रमाणांत लुकसाण जालां. हांगा काम करपी खूबशे कामगार बेपत्ता आसात. न्हंयचे देगे वयलीं खूबशीं घरां उदकान व्हांवून गेल्यांत. आशिकुशीचे गांव रिते केल्यात. ऋषीगंगे बरोबर एनटीपीसीच्या एका प्रॉजेक्टाकूय लुकसाण जालां. तपोवन बैराज, श्रीनगर डॅम आनी ऋषीकेश धरणाचेंय लुकसाण जालां.

मरण आयिल्ल्यांच्या कुटुंबांक
चार लाखांची मजत: मुख्यमंत्री

उत्तराखंडाचे मुख्यमंत्री त्रिवेंद्र सिंह हांणी पत्रकार परिशद घेवन मरण आयिल्ल्यांच्या कुटुंबाक चार लाखांची लुकसाण भरपाय दितले अशें जाहीर केलें. बचावकार्या खातीर आयज (सोमारा) एनडीएफचे कांय जवान येतले. सध्या अडकल्ल्यांक कांय जाणांक बोगद्यांतल्यान सुरक्षीत भायर काडल्यात हो बोगदो सुमार 250 मिटर लांबायेचो आसा. लश्कराचे तीन हेलिकॉप्टर आनी एक हवाई दळाचे हेलिकॉप्टर बचाव कार्य करीत आसा. प्रधानमंत्री नरेंद्र मोदी, गृह मंत्री अमीत शाह हांणी दोन फावटी फोन करून घडणुकेची चवकशी केल्या. तशेंच बिहार, गुजरात आनी हेर राज्यांच्या मुख्यमंत्र्याचे फोन आयल्यात अशें मुख्यमंत्री सिंह हांणी सांगलें.
जिल्हो प्रशासन, पुलीस विभाग आनी आपत्कालीन विभागांक आपत्ती निवारपाचे आदेश दिल्यात. ताका लागून लोकांनी कसल्याच वावड्यांचेर विस्वास दवरचो न्हय. खबरदारीचे सगले उपाय घेतले अशें मुख्यमंत्र्यान स्पश्ट केलें.

चामोली जिल्ह्यांत पावसाचो धोको ना
फुडले दोन दीस चामोली जिल्ह्यांत खंयच पावस वा झेल पडपाचो धोको नाशिल्ल्याची म्हायती हवामान खात्यान दिल्या. हवामान पूर्ण सुकें उरतलें आनी मजत आनी बचाव कार्यांत खंयच आडमेळीं येवची ना अशें हवामान खात्याचे अतिरिक्त म्हासंचालक आनंद शर्मा हांणी सांगलें.

जून 2013 वर्साचे दुर्घटणेंत चार
हजारां परस चड लोकांक आयिल्लें मरण

16-17 जून 2013 दिसा ढगफुटी जाल्ल्यान रुद्रप्रयाग, चामोली, उत्तरकाशी, बागेश्वर, अल्मोडा, पिथौरागड जिल्ह्यांत मोटी दुर्घटणा घडिल्ली. ते दुर्घटणेंत 4,400 परस चड लोकांक मरण आयिल्लें. तशेंच 4,200 परस चड गांवांचो संपर्क तुटिल्लो. तशेंच 11,091 परस चड जनावरांकूय मरण आयिल्लें.

उत्तराखंडच्या लोकां खातीर

मुख्यमंत्र्यांची प्रार्थना

पणजी : उत्तराखंडात बर्फाचो खंड पडून जाल्ले दुर्घटणेंत खूबशा लोकांक मरण आयलें. नव्यान आयिल्ल्या हुंवारांत उत्तराखंडची जनता सुरक्षीत उरची अशी प्रार्थना मुख्यमंत्री डॉ. प्रमोद सावंत हांणी केल्या. हे दुर्घटणे खातीर तांणी दुख्ख उक्तायलां. खूब वेदनादायी अशी घडणूक आशिल्ल्याचें ट्वीट मुख्यमंत्री डॉ. प्रमोद सावंत हांणी केलां.

उत्तराखंड दुर्घटणे खातीर भाजप

सुकाणू समितीची बसका फुडें धुकल्ली

पणजी : उत्तराखंडांत बर्फाचो खंड कोसळून जाल्ले दुर्घटणे खातीर गोंयांत जावपी भाजप सुकाणू समितीची बसका फुडें धुकलची पडली. केंद्रीय गृह मंत्री अमीत शाह हांच्या फुडारपणा खाला काल भाजप सुकाणू समितीची बसका जावपाची आशिल्ली. निमाणे वेळार बसका रद्द करची पडली.

कुडाळ हांगा वैजकी म्हाविद्यालयाचे उक्तावण काल केंद्रीय गृह मंत्री अमीत शाह हांचे हस्तुकीं जालें. हे कार्यावळीक गोंयचे मुख्यमंत्री डॉ. प्रमोद सावंत आनी महाराष्ट्राचे विरोधी पक्ष फुडारी देवेंद्र फडणवीस हाजीर आसलें. हे कार्यावळी उपरांत अमीत शाह हांणी गोंयांक भेट​ दिली. मुख्यमंत्री डॉ. प्रमोद सावंत, प्रदेश भाजप अध्यक्ष सदानंद तानावडे हांणी तांकां विमानतळार येवकार दिलो. कांय वेळा उपरांत अमीत शाह हे उत्तराखंडाक वचपाक गेले. हाका लागून भाजप सुकाणू समितीची बसका काल जाली ना.

तांचे सयत महाराष्ट्राचे आदले मुख्यमंत्री देवेंद्र फडणवीस हांणी गोंयांक भेट दिली.