शेतकार आंदोलना वयल्यान सेलिब्रिटींचें झूज अजून चालूच

शेतकार आंदोलना वयल्यान सेलिब्रिटींचें झूज अजून चालूच

नवी दिल्लीः दोन म्हयने जावन गेले, दिल्लीचे शिमेर नव्या शेतकी कायद्यां आड चालू आशिल्लें आंदोलन आतां संवसारभर पावलां. अर्थांत तें सोशल मिडिया वरवीं. फाटल्या मंगळारा पाॅप स्टार रिहानान ट्वीट करून शेतकारांच्या आंदोलनाक तेंको दिलो. मागीर ग्रेटा थुनबर्ग आनी हेरांनी तिच्या पावलाचेर पावल दवरलें. मागीर क्रिकेट खेळगडो सचीन तेंडुलकर आनी लता मंगेशकार हांचीं ट्विटां आयलीं. दोगांयनी भारता भितरल्या प्रस्नांनी भायल्यांनी तोंड घालचें न्हय अशें म्हणलें. उपरांत सोशल मिडिया वयल्या साबार पक्षांच्या ट्रोलरांनी एकमेकांक खेपपाक सुरवात केली. अजून हें बंद जावंक ना. कांय जाण म्हणटात तिचें चूक, हांचें बरोबर, तर कांय जाण म्हणटात तें बरोबर, हें चूक.

आतां भारतीय सेलिब्रिटी, खेळगडे आनी आंतरराष्ट्रीय सेलिब्रिटी हांचे मदीं वाद रंगला. आयतारा सोनाक्षी सिन्हान या शेतकार आंदोलनाचेर आंतरराष्ट्रीय सेलिब्रिटींक तेंको दिला.

तें म्हणटा, ही गजाल खरी की त्या लोकांक शेतकार कृशी विधेयक कायदो वा शेतांतल्या कांय गजालींची खबर ना. पूण, सोशल मिडियाचेर जो आवाज काडप चालू आसा तो मुलभूत अधिकार, अभिव्यक्ती स्वातंत्र्य, दुस्वास पातळावपी भास, शक्ती, स्वतंत्र इंटरनॅट सेवा हे विशीं आसा. ते आमच्या देशाचेर नियंत्रण मेळोवंक सोदता अशें काय टीव्ही चॅनल दाखोवंक सोदतात. पूण ते सेलिब्रिटी मनिसूच. ते हेरांच्या हक्कां खातीर आवाज काडटात, हें विसरूंक फावना.

अक्षय कुमार, कंगना रणौत, अजय देवगण, सुनील शेट्टी ह्या कलाकारांनी आंतरराष्ट्रीय सेलिब्रिटींचेर खर टिका करीत पुराय देशान एकवटान लढपाची गरज आसा अशें म्हणलां.

सचीन भारतरत्ना खातीर लायक ना – गील

सचीन तेंडुलकर भारतरत्ना खातीर लायक ना, अशें वादग्रस्त उलोवप काँग्रेस खासदार जसबीर एस. गील हांणी केलां. तांणी भारतीय सेलिब्रिटींचेर टिकाय केली. खासदार गील म्हणटात, “जो अक्षयकुमार प्रधानमंत्र्याक तुमी आंबे खाता? कशे खाता? अशें विचारता, ताचो बुद्ध्यांक चड ना. शेतकारां आड जांणी विधानां केल्यांत तांचो आत्मसन्मान सोंपला. सचीनान आपल्या पुताक आयपीएलांत संद मेळची म्हूण सरकाराची लायन घेतल्या. तो भारतरत्नाचे लायकीचो आसा?