दिल्ली बॉम्ब स्फोटः जैश उल हिंद संघटनेन घेतली जापसालदारकी

दिल्ली बॉम्ब स्फोटः जैश उल हिंद संघटनेन घेतली जापसालदारकी

खबरां संस्था

नवी दिल्लीः दिल्लींत इस्रायली दुतावास आशिल्ल्या वाठारांत जाल्ल्या बॉम्ब स्फोटाची जैश उल हिंद हे संघटनेन जापसालदारकी घेतल्या. टॅलिग्राम चॅटांतल्यान ही म्हायती मुखार आयल्या. तपास यंत्रणे कडल्यान ताची पडताळणी चालू आसा. ते आदीं एक चीट यंत्रणेक घडणुकेचे सुवातेर सांपडिल्ली. तातूंतल्यान हो आतंकवादी हल्लो आशिल्ल्याचे संकेत मेळिल्ले.

शुक्रारा हो बॉम्ब स्फोट जाल्लो. केंद्रीय तपास यंत्रणेक दुबावीत चॅनेलाचें टॅलिग्रामाचें एक चॅट मेळ्ळां. हातूंत जैश उल हिंद संघटनेन बॉम्ब स्फोटाची जापसालदारकी स्विकारल्या. ह्या चॅटांत आतंकवादी संघटना हल्ल्याचेर अभिमान उक्तायतना दिसता. पूण, यंत्रणे कडल्यान जैश उल हिंद संघटनेन केल्ल्या दाव्याची पडताळणी सुरू केल्या.

अधिकाऱ्यांनी बॉम्ब स्फोट जाल्ले सुवाते वयल्या तीन सीसीटीव्ही फुटेजाची पळोवणी केली. ह्या फुटेजांत एक कॅब दिसता. ह्या कॅबांतल्यान दोन लोक घडणुकेचे सुवातेर देंवतना दिसतात. ते उपरांत कॅब वता. कॅबांतल्यान देंविल्ले ते दोग चलत बॉम्ब स्फोट जाल्लो ते सुवातेर वतना सीसीटीव्हींत दिश्टी पडटात.

स्पेशल सेलान कॅबाच्या चालका कडेन संपर्क सादला. तशेंच त्या दोगांचें स्कॅच तयार करप चालू आसा. बॉम्ब स्फोटाचे सुवातेर पुलिसांक बरेच साहित्य मेळ्ळां. हातूंत एक पाकीट मेळ्ळा. ह्या पाकिटांत एक चीट आसा. हे चिटयेंत हो फक्त ट्रेलर आसा असो इशारो दिवपी मजकूर आसा.