बायलांचे संगीत नाट्य सर्तींत स्वर सत्तरी संस्थेची हॅट्रीक

बायलांचे संगीत नाट्य सर्तींत स्वर सत्तरी संस्थेची हॅट्रीक

‘सं. मत्स्यगंधा’ पयलें, ‘सं. शारदा’ दुसरें, ‘सं. ययाती आणि देवयानी’ तिसरें
भांगरभूंय प्रतिनिधी

पणजीः राजीव गांधी कला मंदिरान आयोजीत केल्ले स. किशोरीताई हळदणकार यादस्तीक 6 वे अखील गोंय बायलांचे संगीत नाट्य सर्तीचो निकाल जाहीर जालो. सेगीत तिसऱ्या वर्सां पयलें इनाम मेळोवन होंडा- सत्तरीच्या स्वर सत्तरी संस्थेन विक्रम केलो. संस्थेचे ‘सं. मत्स्यगंधा’ नाटक पयलें आयलां. विजयादुर्गा सांस्कृतीक मंडळ – केरी, फोंडेंचे ‘सं. शारदा’ दुसरें जाल्यार अभिनव कला थिएटर – मांद्रे पेडणेंचे ‘सं. ययाती आणि देवयानी’ नाटकाक तिसरें इनाम फावो जालें.

श्री देवी माऊली कला क्रिडा आनी सांस्कृतीक मंडळ मेणकुरें, दिवचल हांच्या ‘सं. गुरूदक्षिणा’, श्री गुरूकृपा संगीत सांस्कृतीक संस्था, म्हाड्डोळ हांच्या ‘सं. सौभद्र’ आनी सांताक्रुजाच्या निशद पणजी हांणी सादर केल्ल्या ‘सं. संशयकल्लोळ’ नाटकाक वळेरेन पयलें, दुसरें आनी तिसरें उमेद वाडोवपी इनाम फावो जालें.

वयक्तीक इनामांत दिग्दर्शनाचें पयलें इनाम ‘सं. मत्स्यगंधा’ नाटका खातीर शिवनाथ नायक हांकां, दुसरें इनाम ‘सं. शारदा’ नाटका खातीर कमलाक्ष खेडेकार हांकां जाल्यार ‘सं. ययाती आणि देवयानी’ नाटका खातीर प्रशांत मांद्रेंकार हांकां फावो जालें.

दादल्याचे भुमिके खातीर कृतिका जाण (भुजंगराव, सं. शारदा), मृण्मयी मांद्रेंकार (ययाती, सं. ययाती आणि देवयानी) आनी डॉ. वेदिका वाळके (फाल्गुनराव, सं. संशयकल्लोळ) हांकां जाल्यार बायलांचे भुमिके खातीर संपदा गांवस (अंबा, सं. मत्स्यगंधा), धनश्री नायक (सीता, सं. अयोध्येचा ध्वजदंड) आनी प्राजक्ता लोटलीकार (कृतिका, सं. संशयकल्लोळ) हांकां इनामां फावो जालीं.

उत्कृश्ठ नेपथ्याचें पयलें इनाम ‘सं. गुरूदक्षिणा’ नाटका खातीर नितीन नायक हांकां जाल्यार प्रमोद मांद्रेंकार हांकां ‘सं. ययाती आणि देवयानी’ नाटका खातीर दुसरें इनाम फावो जालें.

उजवाड येवजणेचे पयलें इनाम ‘सं. मत्स्यगंधा’ नाटका खातीर उदय धुपकार हांकां जाल्यार दुसरें इनाम ‘सं. गुरुदक्षिणा’ नाटका खातीर नितेश नायक हांकां फावो जाले.
ध्वनीसंकलनाचें पयलें इनाम दीपक गांवस (सं. मत्स्यगंधा) जाल्यार निलेश नायक (सं. गुरूदक्षिणा) हांकां मेळ्ळें.

वेशभुशेचें पयलें इनाम प्रेरणा देसाय, दुसरें दत्ताराम सोपटे हांकां मेळ्ळें. रंगभुशेचें पयलें इनाम जितेंद्र परब, दुसरें निळकंठ खलप हांकां मेळ्ळें. उत्कृश्ठ संवादिनी, ऑर्गन वादनाचें पयलें इनाम महेश गांवस, दुसरें प्रदीप शिलकार हांकां मेळ्ळें.


तबला वादनाचे पयलें इनाम शैलेश शिरोडकार, दुसरें मिलिंद परब हांकां मेळ्ळे.
दादल्याचे भुमिकेंत उत्कृश्ठ गायना खातीर लता गांवस (सं. मत्स्यगंधा) हांकां पयलें जाल्यार दुसरें इनाम भक्ती धुपकार (सं. ययाती आणि देवयानी) हांकां मेळ्ळें.

बायलांचे भुमिकेंतल्या गायना खातीर शर्मिश्ठा भुमिके खातीर सिद्धी पार्सेकार हांकां पयलें जाल्यार सं. सौभद्र नाटकांतल्या सुभद्रेचे भुमिके खातीर चिन्मयी कामत हांकां दुसरें इनाम मेळ्ळें.

बाल कलाकारा मदीं सं. गुरूदक्षिणा नाटकांतले भुमिके खातीर साईली नायक हिका पयलें जाल्यार सं. शारदा नाटकांतले मंदाकिनीचे भुमिके खातीर अनुष्का जाण हिका दुसरें इनाम फावो जालें.

सर्तीचें परिक्षण मंगला जांभळे, प्रचला आमोणकार आनी निवेदिता चंद्रोजी हांणी केलें. बेगिनूच कला मंदिरांत जावपी सुवाळ्यांत जैतिवंतांक इनामां भेटयतले अशें आयोजकांनी कळयलां.