राम गोपाल वर्माचें ऑफिस गोंयांत

राम गोपाल वर्माचें ऑफिस गोंयांत

खबरां संस्था

मुंबयः साबार सुपरहीट फिल्मांचें दिग्दर्शन करपी राम गोपाल वर्मान मुंबय शार सोडली. ताणें आपलें कार्यालय गोंयांत शिफ्ट केलां. पूण, कामाच्या संदर्भांत तो मुंबय यो-वच करतलो.

आपूण ज्या प्रोजेक्टाचेर काम करता ताका गोंय योग्य आसा. आपलें ऑफिस ‘फॅक्टरी’ आतां मुंबय ना. लॉकडावनाच्या काळांत आपणेन साबार वेळ हैदराबादांत घालयिल्लो. पूण, मुंबय शार खूब आदींच सोडिल्लें अशें ताणें सांगलें.

कोरोना महामारी आनी लॉकडावन हाका लागून साबार गजाली बदल्ल्यो. आतां दरएकल्यान संपर्काच्या नवीन माध्यमांची संवय लावन घेतल्या. पर्सनल मिटींग लेगीत आतां  भुतकाळ जाल्या. आतां दरेकलो ऑनलायन मिटींग वा चॅट्स हांचेर उलोवपाक लागल्यात.

राम गोपाल वर्माचें ’12 ओ क्लॉक’ फिल्म रोखडेंच प्रदर्शीत जावपाचें आसा. मिथुन चक्रवर्ती ह्या फिल्मांत मानसोपचार तज्ञाची भुमिका वठयता. मिथुना खेरीत फ्लोरा सैनी आनी मानव कौल हांच्यो लेगीत म्हत्वाच्यो भुमिका आसात. तशेंच राम गोपाल वर्मा आपल्यो कांय वॅब सिरिज लेगीत घेवन येता.