इफ्फीः उक्तावणाक ‘एनॉदर रावण्ड’;समारोपाक ‘वायफ ऑफ स्पाय’

इफ्फीः उक्तावणाक ‘एनॉदर रावण्ड’;समारोपाक ‘वायफ ऑफ स्पाय’

प्रतिनिधी। भांगरभूंय

पणजीः डॅनीश फिल्मकार थॉमस विन्टरबर्गाचें फिल्म ‘एनॉदर रावण्ड’ वरवीं 51व्या इफ्फीचो पड्डो उगडटलो.

ऑस्कर पुरस्कार 2020 खातीर डॅनमार्कान हें फिल्म धाडलां. टोरंटो आंतरराष्ट्रीय फिल्म महोत्सव 2020त ह्या फिल्माचो प्रिमीयर जाल्लो. सेंट सॅबॅस्तियन आंतरराष्ट्रीय फिल्म महोत्सवांत ह्या फिल्माचो अभिनेतो मिक्केलसन, थॉमस बो लार्सन, मॅग्नस मिलेंग तशेंच दिग्दर्शक विन्टरबर्गाक रुप्या पदक फावो जालां.

इफ्फी दर वर्सा गोंयांत 20 ते 28 नोव्हेंबर मजगतीं जाता, पूण हे खेपे कोरोना महामारीक लागून आयोजकांनी इफ्फी मुखार धुकलपाचो निर्णय घेतलो. हे खेपे इफ्फी 16 ते 24 जानेवारी मजगतीं जातलो.

‘वायफ ऑफ स्पाय’ ह्या जपानी फिल्मा वरवीं समारोप

‘वायफ ऑफ स्पाय’ ह्या जपानी फिल्मान इफ्फीचो समारोप जातलो. 24 जानेवारीक 51 व्या इफ्फीच्या समारोपाक हें फिल्म दाखयतले. कियोशी कुरोसावा हांचे हे फिल्म. व्हॅनीस आंतराष्ट्रीय फिल्म फॅस्टीवलांत ह्या फिल्माच्या दिग्दर्शकाक सिल्वर लायन पुरस्कार फावो जाल्लो.