भांगरभूंय | प्रतिनिधी
सर्वसामान्य 3.48 टक्के दरवाड, तरीय 200 कोटींचो उणाव
पणजी : गोंयांत 200 युनिट मेरेन वीज वापरपी 4 लाख गिरायकां आसात. हांचे खातीर 6 टक्के विजेच्या दरांत वाड करपाचो प्रस्ताव आसा. घरगुती, शेती, वेवसायीक, उद्देगीक मेळून सामान्यपणान 3.48 टक्के वीज दरवाड करपाचो प्रस्ताव आसा. वीज बिल, सरकाराचो निधी विचारांत घेतलो तरी लेगीत खात्याक 200 कोटींचो उणाव जाणवतलो, अशें खात्यान वीज नियमन आयोगाक सादर केल्ल्या प्रस्तावांत नमूद केलां.
वीज खात्याच्या प्रस्तावीत वीज दरवाडी खातीर सोमारा पणजेत भौशीक सुनावणी जाली. आयज मंगळारा मडगांवां भौशीक सुनावणी जातली. लोकांच्यो हरकती तशेंच सुनावणेंचो विचार करून जोड वीज नियमन आयोग वीज दरवाडी विशीं निर्णय घेतले. जोड वीज नियमन आयोगान (जेईआरसी) मान्यताय दिले उपरांत ही दरवाड 1 एप्रील 2024 सावन लागू जातली.
खात्या कडेन वीज ना तशेंच बेकायदाे वीज वापराच्यो कागाळी येतात. हातुंतल्यो 95 टक्के कागाळी बोगस आसतात, अशें मुख्य वीज अभियंते स्टीफन फर्नांडीस हांणी सांगलें.
फुडल्या 25 ते 30 वर्सांचो विचार करून खात्यान मुळाव्या सुविधांची उबारणी करची पडटा. उद्देगीक तशेंच घरगुती विजेची गरज दिसान दीस वाडत आसा. ही गरज पुराय करपाक नवी वीज उपकेंद्रां उबारपा सयत ट्रान्सफॉर्मर नवे घालपाची गरज आसा. हाका लागून वीज दरवाड करपाचो खात्याचो प्रस्ताव आसा. सामान्यपणान ही दरवाड 3.48 टक्के आसा, अशें मुख्य वीज अभियंते स्टीफन फर्नांडीस हांणी भौशीक सुनावणी वेळार सांगलें.
मुख्य वीज अभियंते स्टीफन फर्नांडिस हांणी निधी आनी येणावळीची आंकडेवारी सादर केली. 2024 – 25 वर्सा खातीर खात्याचो अदमाचे खर्च 3057.5 कोटी आसतलो. वीज बिलांतल्यान 2,442.60 कोटी रुपयांची येणावळ येवप शक्य आसा. खर्च आनी येणावळ हातूंत 614.94 कोटींचो फरक आसा. अर्थसंकल्पांतल्यान खात्याक 414.73 कोटींची मजत मेळप शक्य आसा. हे मजती उपरांत 200.22 कोटीं रुपयांचो उणाव जाणवतलो. वीज बिलांचे दर वाडयले जाल्यार आनीक 85 कोटी रुपया मेळप शक्य आसा. सध्याच्या दरांतल्यान 115.3 कोटींची येणावळ येवप शक्य आसा. दरवाड जाली जाल्यार खर्च आनी येणावळ हाचो मेळ घालप शक्य जातलें.
वीज गळटीचें प्रमाण जाले उणें
वीज पुरवण यंत्रणेत सुदारणा जायत आसा. कळंगूट आनी साळीगांवां वीज उपकेंद्र जाले उपरांत दर्यादेग वाठारांतल्या वीज पुरवणेंत सुदारणा जातली. खात्याच्यो सेवा आनी हेर म्हायती दिवपा खातीर वेबसायट अद्ययावत जातली. उपाय येवजणेक लागून गळटीचें प्रमाण उणें जालां. बेकायदां विजेच्यो जोडण्यो दिल्ल्याचो आरोप जाता आसलो तरी भलायकी कायद्या खाला विजेची जोडणी दिवप बंधनकारक आसा. खात्यान आतां मीटर दुसरे बसोवपाक सुरवात केल्या. डिजीटल मिटरांक लागून योग्य बील येता. पयलीं उणें बिल येताले आतां योग्य बील येता. खात्या कडेन बिलां वा हेर ज्यो कागाळी येतात, तातुंतल्यो 95 टक्के कागाळी बोगस आसतात, अशें मुख्य वीज अभियंत्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
