भांगरभूंय | प्रतिनिधी
हस्तकला केंद्रा खातीर दितले बंद शाळांच्यो इमारती
पणजी: सांग्यार 16 हजार चौखण मिटर सुवातेंत सुमार 20 कोटी रुपया खर्च करून हस्तकला गांव उबारतले अशी घोशणा मुख्यमंत्री डॉ. प्रमोद सावंत हांणी केली. मिनेझीस ब्रागांझा सभाघरांत हस्तकला म्हामंडळ आनी नाबार्डा वतीन आयोजीत हॅण्डलूम ऑफ फाम्स प्रोड्युसर्स ह्या कार्यावळीच्या उक्तावण सुवाळ्यांत ते उलयताले.
गोंयचें परंपरीक वस्त्र म्हूण कुणबी साडयेची वळख आसा. फाटल्या कांय वर्सांत ह्यो साडयो पड्ड्या आड वचत आसात. पूण कांय कारागिरांनी ही कला जिती दवरल्या. नाबार्डच्यो उषा रमेश हांणी फुडाकार घेवन हस्तकला कारागिरांक प्रोत्साहन दिवपाक पावलां उबारल्यांत. तांणी म्हजे कडेन चर्चा केली. तातूंतल्यानूच कुणबी शाल वापरपाक आनी सगल्या सरकारी कार्यावळींनी कुणबी शाल दिवपाक सुरवात जाली. जर हस्तकला कारागिरांनी एकठांय येवन काम सुरू केलें जाल्यार बंद शाळांच्या इमारतींनी तांच्या केंद्रा खातीर दितले अशें मुख्यमंत्री डॉ. प्रमोद सावंत हांणी सांगलें.
सद्या सांग्यार आनी कोरगांवां हस्तकला केंद्र आसा. केंद्र सरकाराचे मजतीन हस्तकला कारागिरांक प्रोत्साहन दिवपाक तशेंच गोंयचें हें वस्त्र संवसारीक पांवड्यार पावोवपा खातीर हस्तकला गांवाची उबारणी करतले. कुणबी साडयांक बरी मागणी आसा. सद्या अडेज हजार रुपया मेरेन तिची विक्री जायत आसा. जर उत्पादन वाडयत जाल्यार एक साडी 4 ते 5 हजार रुपया मेरेन विकूंक मेळटली अशें तांणी सांगलें.
गोंयांत हस्तकला मंडळा वतीन कुशळटायेचेर आदारीत कारागीर तयार करपा खातीर प्रशिक्षण आयोजीत करतात. हाचे अंतर्गत दर म्हयन्याक 750 रुपया दितात. हातूंतल्यान प्रशिक्षीत कारागिरांनी आपलो वेवसाय सुरू करचो हे खातीर मुखार सरचें अशें आवाहन मुख्यमंत्र्यान केलें.
मंडळा वतीन उत्तर आनी दक्षीण गोंयांतल्या दरेकी 500 प्रमाण 1000 बायलांक प्रशिक्षण दीत आशिल्ल्याचें तांणी सांगलें. गोंयांत कॉयर आनी हस्तकला उद्देगा खातीर विशेश सहकार्य करतले अशेंय मुख्यमंत्री डॉ. प्रमोद सावंत हांणी सांगलें.
उण्या कळंतरांत मेळटलें रीण
कारागीर मुखार आयले, तांणी बरें प्रशिक्षण घेतलें जाल्यार ईडीसी वतीन 2 ते 4 टक्के कळंतरांत वेवसाया खातीर रीण उपलब्ध केलां. हाचो लाव कारागीर घेवंक शकतात. एससी, एसटी, ओबीसी सगल्यां खातीर येवजण उपलब्ध आसा अशी म्हायती मुख्यमंत्री डॉ. प्रमोद सावंत हांणी दिली.
ऑनलान विक्रे खातीर मजत
कुणबी साडयांक मार्केट उपलब्ध करून दिवपा खातीर प्रशिक्षण, उत्पादन आनी मार्केटींग हे खातीर सरकार मजत करतलें. ते खातीर ऑनलायन मार्केटींग आनी विक्रे खातीर अॅप उपलब्ध केलां अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
