भांगरभूंय | प्रतिनिधी
छाननी उपरांत 14 अर्ज भायरायले, आयज अर्ज फाटीं घेवपाचो दीस
भांगरभूंय I प्रतिनिधी
पणजी : पंचायत वेंचणुकां खातीर आयिल्ल्या वट्ट 6,256 अर्जांतल्यान 14 अर्ज मंगळारा छाननी उपरांत भायरायले. जाल्यार 5,723 अर्ज स्विकारले. बुधवारा अर्ज फाटीं घेवपाचो दीस. ताका लागून वेंचणुकेच्या रिंगणांत कितले उमेदवार उरतात हे आयज सांजे मेरेन स्पश्ट जातलें.
मंगळारा जाल्ले अर्जाचे छाननींत बार्देसांतले सगल्यांत चड पांच अर्ज भायरायले. ते उपरांत फोंडें म्हालांतल्या पंचायतींतले तीन, सत्तरींतले दोन आनी पेडणें, दिवचल, तिसवाडी आनी साश्टींतले दरेकी एक अर्ज भायरायले. पेडणेंतल्या 17 पंचायतीं खातीर 489, दिवचलेंतल्या 17 पंचायतीं खातीर 452, सत्तरींतल्या 12 पंचायतीं खातीर 333, बार्देसांतल्या 33 पंचायतीं खातीर 1,142, तिसवाडींतल्या 18 पंचायतीं खातीर 643, फोंडेंतल्या 19 पंचायतीं खातीर 660, धारबांदोडेंतल्या 5 पंचायतीं खातीर 143, सांगेंतल्या 7 पंचायतीं खातीर 191, साश्टींतल्या 33 पंचायतीं खातीर 938, मुरगांवांतल्या 7 पंचायतीं खातीर 248, केपेंतल्या 11 पंचायतीं खातीर 283 आनी काणकोणांतल्या 7 पंचायतीं खातीर 201 अर्ज वैद्य थारले.
मजगतीं, राज्यांतल्या 186 पंचायतीं खातीर 10 ऑगस्टाक मतदान जातलें. 12 ऑगस्टाक मतमेजणी जातली. विवीध पंचायत प्रभागांनी 10 ते 11 उमेदवारांनी अर्ज सादर केल्यात. ताका लागून हे खेपेची पंचायत वेंचणूक अटीतटीची जावपाची शक्यताय आसा. पंचायत वेंचणुको पक्षीय चिन्नाचेर जायनात, तरी भाजप, काँग्रेस, रिव्हॉल्यूशनरी गोवन्स हे पक्ष वेंचणुकेंत स्वतंत्र पॅनेल उबारतलें. जाल्यार हेर पक्ष उमेदवारां प्रमाण तेंको दितले. वेंचणूक आयोगान मतदानाची नेटान तयारी सुरू केल्या.
10 ऑगस्टाक भौशीक सुटी
पंचायत वेंचणुकांच्या मतदाना खातीर 10 ऑगस्टाक भौशीक सुटी जाहीर केल्या. पंचायत वाठारांत मतदार आशिल्ल्या खाजगी क्षेत्रांतल्या कर्मचाऱ्यांक भरपगारी सुटी आसतली, अशें सर्वसामान्य प्रशासनान जारी केल्ल्या परिपत्रकांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
