भांगरभूंय | प्रतिनिधी
आयज अठरा जून. 1946 त गोंयांत मुक्ती खातीर क्रांती सुरू जाली तो दीस आसलो मंगळारचो. जेन्ना गोयांत क्रांतीची किट्ट पेटिल्ली आनी सळसळट्या रगताक नवी दिका मेळिल्ली. तोच हो दीस 18 जून. “उदक लेगीत जाल्लें रगत आनी रगत जाल्लें हून भावा तुका याद आसा 18 जून?” ही कविता डॉ. मनोहरराय सरदेसाय हांची. ही कविता गवाय दिता अठरा जून ह्या दिसाची.
18 जून हो दीस गोंयच्या इतिहासांत आगळे वेगळ्या स्थानाचोय. ह्या दिसाक क्रांती दीस म्हूण मनयतात. 18 जून 1946 या दिसा डॉ. राममनोहर लोहियान गोंयचे मुक्तीचो खऱ्या अर्थान बुन्यादी फातर घालो. पुर्तुगिजांची राजवट दिसानदिस बळीष्ट जायत आशिल्ली. गुलामगिरीच्या त्रासा भितर गोंयकारांची जीण झरत आशिल्ली. दरेक गोंयकार गुलामगिरीच्या साम्राज्यांत स्वताक चेपून जीण सारतालो. तो स्वता चेंपत आशिल्लोच, पूण ताचें गोंयकारपणूय शेणत आशिल्लें. अशे हे गुलामगिरीचे राजवटी आड झगडूंक डॉ. राममनोहर लोहियान न्हिदिल्ल्या गोंयकारांक जागे केले. दरेकल्यान दिल्लें बलिदान आनी त्याग ह्या दिसा याद करतात. डॉ. लोहिया आनी डॉ. जुलियांव मिनेझीस हांणी सालाझार सरकारा आड लडपाक लोकांक प्रवृत्त केले. गोयांत क्रांती घडोवन हाडपाक या दोगांचो मोलाचो वांटो आसा. 18 जून 1946 क तांणी मडगांवां सभा घेतली आनी लोकां मदी मुक्तीची ज्योत पेटयली. गोंयची मुक्ती चळवळ बरोच तेंप चल्ली. 18 जूनाचें हे चळवळींत योगदान आसा. 19 डिसेंबर 1961 ह्या दिसा गोयांक मुक्ती मेळ्ळी. केल्ल्या वावराचें फळ मेळ्ळें. 18 जुनाची याद म्हूण गोंयभर तरेतरेच्यो कार्यावळी घडोवन हाडटात. खासा कार्यावळ पणजेच्या आजाद मैदानार जातात. गोंयच्या मुक्ती लढ्यांत स्वताच्या जिवाचें बलिदान दिल्ल्या हुतात्म्याचें स्मरण करूया आनी तांकां आर्गां ओंपुया. गोंयची ही भूंय राखुया. मेळिल्ल्या स्वातंत्र्याची व्हडवीकाय राखून एक बरो सुजाण नागरिक जावया आनी गोंयचे दायज आनी गोंयकारपण सांबाळूया. जय भारत, जय गोंय.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
