170 कनिश्ठ अभियंत्यांची भरती प्रक्रिया रद्द

भांगरभूंय | प्रतिनिधी

न्यायालयांत देविदास पांगम हांची म्हायती; पात्र उमेदवारां मदीं निरशेणी

पणजी: विधानसभा वेंचणुकेच्या तोंडार फाटल्या कार्यकाळांतल्या भाजपा सरकारान भौशीक बांदकाम खात्यांत (पीडब्ल्यूडी) सुरू केल्ली 170 कनिश्ठ अभियंत्यांची भरती प्रक्रिया गोंय सरकारान रद्द केल्ल्याची म्हायती अ‍ॅडव्होकेट जनरल देविदास पांगम हांणी मंगळारा उच्च न्यायालयांत दिली. तशेंच ह्या प्रकरणांत दाखल केल्ली याचिका न्यायालयान निकालांत काडली.

‘पीडब्ल्यूडी’तले नोकर भरतेंत कोट्यांनी रुपयांचो घोटाळो जाल्ल्याची कागाळ भाजपाच्या आमदारांनी केले उपरांत मुख्यमंत्री डॉ. प्रमोद सावंत ह्या घोटाळ्याचे चवकशे खातीर समितीची स्थापणूक केल्ली. हे समितीन नोकरभरती प्रक्रियेची चवकशी करून निमाणो अहवाल गोंय सरकाराक सादर केलाे. कनिश्ठ अभियंत्यांचे भरती प्रक्रियेंत विसंगती दिसून आयिल्ल्याचें समितीन निमाण्या अहवालांत स्पश्टपणान नमूद केलां. ताका लागून सरकारान ही भरती प्रक्रिया रद्द केल्या अशेंय अ‍ॅड. पांगम हांणी न्यायालयांत स्पश्ट केलें.

विधानसभेची वेंचणूक तोंडार आसतना पीडब्ल्यूडीत जाल्ले नोकरभरतेंत घोळ जाला. डिप्लोमाधारक उमेदवारांक पदवी मेळयिल्ल्या उमेदवारां परस चड गूण मेळ्ळ्यात असो दावो करून उमेदवार आदेशकुमार चोडणकारान उच्च न्यायालयांत धांव घेतिल्ली.

‘पीडब्ल्यूडी’त 170 कनिश्ठ अभियंतो पदां सयत वट्ट 310 पदां भरपाचे निश्चीत करून सरकारान 27 ऑगस्ट 2021 दिसा जायरात दिवन उमेदवारांचे अर्ज मागयले आनी नोकरभरती प्रक्रिया सुरू केल्ली. उपरांत याचिकादार चोडणकारान 13 सप्टेंबर 2021 दिसा नोकरे खातीर अर्ज सादर केलो. 13 नोव्हेंबर 21 दिसा कनिश्ठ अभियंतो पदा खातीर लेखी परिक्षा घेतली. 16 डिसेंबर 2021 दिसा लेखी परिक्षेचो निकाल जाहीर जालो. तातूंत डिप्लोमाधारक उमेदवारांक पदवी मेळयिल्ल्या उमेदवारां परस चड गूण मेळिल्ल्याचें दिसून आयले उपरांत सगल्या उमेदवारां मदीं आनी तांच्या पालकां मदीं खवदळ पडलो. उपरांत याचिकादारान न्यायालयांत धांव घेतिल्ली.

कितें घडलें?

विधानसभा वेंचणुकेचे कांय म्हयने पयली आदल्या भाजप सरकारान पीडब्ल्यूडीत नोकर भरती सुरू केली. ताका गोंयांतल्या तरणाट्यां कडल्यान बरो प्रतिसाद मेळ्ळो.

– नोकर भरती प्रक्रिया जाले उपरांत खात्या कडल्यान कनिश्ठ अभियंतो म्हूण पात्र थारिल्ल्या कांय जाणांक नेमणुकेचीं पत्रांय दिलीं.

– ह्याच बोवाळांत भाजपाचे पणजीचे आमदार बाबूश मोंसेरात हांणी कनिश्ठ अभियंतो भरतींत तेन्नाचे भौशीक बांदकाम मंत्री दीपक प्रभू पाऊसकार हांणी कोट्यांनी रुपयांचो घोटाळो केल्ल्याचें तशेंच आपल्या मर्जींतल्या उमेदवारांक पास करून हेर पात्र उमेदवारांचेर अन्याय केल्ल्याचो दावो केलो.

– मंत्री पाऊसकार हांणी नोकरी दिवपा खातीर तरणाट्यां कडल्यान दरेकी 25 ते 30 लाख घेतिल्ल्याचेंय बाबूश हांणी म्हणिल्लें. तांच्या आरोपांचे सत्ताधारी पक्षांतल्या कांय आमदारांनीय समर्थन केलें. उपरांत विरोधी काँग्रेस पक्षूय हे विशीं आक्रमक जालो.

– सत्ताधारी आमदारां कडल्यान जाल्ल्या आरोपांक लागून मुख्यमंत्री डॉ. प्रमोद सावंत हांणी ही नोकर भरती स्थगीत दवरली आनी तेन्नाच्या प्रधान वित्त सचिवांचे अध्यक्षताये खाला तीन वांगड्यांची चवकशी समिती नेमिल्ली.

पात्र थारिल्ल्या उमेदवारां मदीं निरशेणी

कनिश्ठ अभियंत्यांची भरती प्रक्रिया रद्द केल्ल्याची म्हायती अ‍ॅडव्होकेट जनरल देविदास पांगम हांणी न्यायालयांत दिले उपरांत जे उमेदवार ह्या पदां खातीर पात्र थारिल्ले तांचे मदीं निरशेणी पातळ्ळ्या. पात्र थारिल्ले उमेदवार खूबशा म्हयन्यां सावन चवकशी समितीच्या अहवालाची वाट पळयताले. तातूंतल्यान समाधानकारक निर्णय येतलो अशें तांकां दिसतालें. पूण, सरकारान भरतीच रद्द केल्ल्यान तांचे मदलो असंतोष वाडपाची शक्यताय आसा.