भांगरभूंय | प्रतिनिधी
जुवारी पुला वयल्यान घेतली उडी, कामगारांनी वाटायली
भांगरभूंय । प्रतिनिधी
मुरगांवः शेनवारा 6 ऑगस्टाक सकाळीं 14 म्हयन्याचे चलयेची तिचे आवयनूच घरांत हत्त्या केली. उपरांत दुबावीत आवयन जुवारी पुला वयल्यान उडी घेवन आत्महत्या करपाचो यत्न केलो. पूण दिलीप बिल्डकॉन लिमिटेडाच्या कर्मचाऱ्यांनी तिका वाटायली आनी पुलिशेच्या सुवादीन केली. सध्या तिचेर गोमॅकाँत उपचार चालू आसात. पुलिसांनी ह्या प्रकरणांत तपास सुरू केला.
वास्को पुलीस स्टेशनाचे पुलीस निरिक्षक कपील नायक हांणी दिल्ले म्हायती प्रमाण 6 ऑगस्टाक फांतोडेर 6 वरांचेर आगशी पुलीस स्टेशना वयल्यान चिखलेचे एके बायलेन जुवारी पुला वयल्यान उडी मारून आत्महत्या करपाचो यत्न केल्ल्याची म्हायती मेळ्ळी. थंय पुलाचें काम करपी दिलीप बिल्डकॉन लिमिटेडाच्या कांय कर्मचाऱ्यांनी ते बायलेक जिवदान दिवन तिका आगशी पुलिशेच्या सुवादीन केली. उपरांत वास्को पुलीस स्टेशनाचे पुलीस निरिक्षक कपील नायक आनी तांच्या सहकाऱ्यांनी चिखलेच्या पुलीस कॉटरा फाटल्यान गोवा शिपयार्डाच्या गेस्ट हावसा लागीं आशिल्ल्या तिच्या बापायच्या घरा वचून चवकशी केली. तिच्या बापायक दिसलें ती घरांत न्हिदल्या आसतली. पूण पुलिसांनी घडिल्ली खबर तांकां सांगतकच ती न्हिदिल्ले ते पयल्या माळ्या वयले कुडींत वचून पळयलें. मात थंय तांकां तिचें 14 म्हयन्यांचें भुरगें मेल्ले अवस्थेंत दिसलें आनी गॅलरीचें दार उक्तें दिसलें. पुलिसांनी घडणुकेचो पंचनामो केलो आनी चवकशेक सुरवात केली.
मेळिल्ले म्हायती प्रमाण मनिषा गोनी (वाल्सन) (38) आनी तिची 14 म्हयन्यांची चली जर्मनीच्यान आपल्या बापायच्या चिखली वाठारांतल्या बंगल्यार आयिल्ली. मनिषा ही कांय दिसां सावन थतरवितर आशिल्ली, अशी म्हायती मेळ्ळ्या.
मनिषाचो घरकार निलेश गोनी हो जर्मनीक कामाक आसा. 6 ऑगस्टाक सकाळीं मनिषाचो आत्महत्त्येचो यत्न दोन खेपे फसलो. तिणें स्वताच्या 14 म्हयन्याचे चलयेची गळो आवळून हत्त्या केली. उपरांत तिणें स्वताच्या हाताची शीर कापून आत्महत्त्या करपाचो यत्न केलो. तोवूय येसस्वी जावंक नाशिल्ल्यान तिणें बेडरुमाचें दार उगडून गॅलरी वयल्यान ग्रील्साचो आदार घेवन खाला देंवली. ते आदीं तिणें आपले दोनूय मोबायल फोन आंगणांत झाडांनी उडयले, आपले बूट गेटी भायर दवरून ती आत्महत्त्या करपा खातीर जुवारी पुलाचेर गेली आनी पुला वयल्यान खोल न्हंयेंत उडी मारली.
मनिषा बुडटनाचो व्हिडियो व्हायरल
कांय वाहन चालकांनी हो प्रकार पळयलो आनी ती बुडटा तो व्हिडियो व्हायरल केलो. उपरांत थंय लागींच आशिल्ल्या दिलीप बिल्डल्कॉन लिमिटेडाच्या कामगारांनी हो प्रकार पळोवन बुचकाळपी मनिषाक वयर काडली आनी आगशी पुलिशेच्या सुवादीन केली. पुलिसांनी तिची चवकशी करून ताकतिकेन तिका गोमॅकाँत उपचारा खातीर दाखल केली. तशेंच ही म्हायती वास्को पुलिशेक दिली.
मजगतीं, वास्को पुलिसांनी चिखली दाबोळे वचून हे घडणुकेचो पंचनामो केलो आनी चलयेची कूड पोस्टमार्टमा खातीर धाडली. पुलिसांनी दुबावीत आवयचेर गुन्यांव दाखल केला. वास्को पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
