भांगरभूंय | प्रतिनिधी
प्रदेशाध्यक्ष तानावडेः 50 परस चड पंचायतींच्या सरपंच, उपसरपंचांची निवड बिनविरोध
भांंगरभूंंय I प्रतिनिधी
पणजी : राज्यांतल्या 186 पंंचायतींच्या सरपंंच तशेंच उपसरपंंचांंची निवड सोमारा शांंततायेन जाली. अपेक्षे प्रमाण चडश्यां पंंचायतींचेर भाजप समर्थक सरपंंचांंची निवड जाल्या. 128 परस चड पंंचायतींचेर भाजप समर्थक सरपंंच जाल्याचो दावो प्रदेश अध्यक्ष सदानंंद शेट तानावडे हांंणी सोमारा पत्रकारां कडेन उलयतना केला.
नवनिर्वाचीत सरपंच, उपसरपंच आनी पंचांनी ‘स्वंपूर्ण गोंय’ मोहिमेंत योगदान दिवन आपापल्या पंचायतींची सर्वांगी उदरगत करची, असो उलो मुख्यमंत्री डॉ. प्रमोद सावंत हांणी मारला.
अपेक्षे प्रमाण भाजपाचे मंंत्री तशेंच आमदारांंक समर्थकांंची वर्णी सरपंंचपदाचेर लावपाक येस आयलांं. 186 पंचायतींतल्यान 50 परस चड पंंचायतींच्या सरपंंच तशेंच उपसरपंंचांंची निवड बिनविरोध जाली. पंंचायत वेंचणुकेंत मोट्या प्रमाणांत भाजप समर्थक कार्यकर्ते उबे राविल्ले. मंंत्री तशेंच आमदारांंचो तांंकां तेंको आशिल्लो. हाका लागून दरेकी पंंचायतींत भाजप समर्थक कार्यकर्ते वेंचून आयलें. मुख्यमंत्री डॉ. प्रमोद सावंंत, पर्यटन मंंत्री रोहन खंंवटे, कला आनी संंस्कृती खात्याचे मंंत्री गोविंंद गावडे, सभापती रमेश तवडकार, भलायकी मंंत्री विश्वजीत राणे हांंणी आपल्या पसंंतीच्या उमेदवारांक समर्थन दिवन तांकां जैतिवंत केले. हाका लागून त्या, त्या मतदारसंंघात तांंच्या पसंंतीचे उमेदवार सरपंंच जाले. बायलांं पंंचांंचो आंकडो व्हड आसा. हाका लागून बऱ्याच पंंचायतींचेर दादले सरपंंच जाल्यार बायल उपसरपंंच असो प्रकार घडला.
केतन भाटीकार हांंकां कुर्टी – खांडेपार पंंचायतींचेर वर्चस्व मेळोवपाक येस आयलां. केपेंचे आमदार एल्टन डिकोस्ता हांंचे समर्थक मोरपिर्ला, नाकेरी आनी बाळ्ळी पंंचायतींचे सरपंंच जाल्यात.
जोसेफ सिक्वेरा कळंंगूटचे सरपंंच
आमदार मायकल लोबो हांंचे विरोधक जोसेफ सिक्वेरा हांंचे कळंंगूट पंंचायतीचेर वर्चस्व कायम आसा. कळंंगूट पंंचायतीचेर मायकल लोबो हांंच्या पॅनलाचे तीनूच
उमेदवार वेंचून आयलें. जोसेफ सिक्वेरा हे सरपंंच जाल्यार गीता परब हांची उपसरपंच पदाचेर निवड जाल्या.
जिल्हो पंचायत; तीन मतदारसंघांत 16 ऑक्टोबराक वेंचणूक
जिल्हो पंचायतींच्या रेयश मागूश, दवर्ली आनी कुठ्ठाळी ह्या तीन मतदारसंघांनी 16 ऑक्टोबर दिसा वेंचणुको जातल्यो. पंचायत खात्यान हे विशींची अधिसुचोवणी जारी केली. रेयश मागूश ओबीसीं खातीर, दवर्ली उक्त्या गटा खातीर जाल्यार कुठ्ठाळी मतदारसंघ अनुसूचीत जमाती खातीर (एसटी) राखीव दवरिल्ल्याचे अधिसुचोवणेंत नमूद केलां.
72 वर्सां पिरायेची बायल सरपंंच
किर्लपाल दाबाळ पंचायतीच्या सरपंंचपदाचेर रूक्मिणी गांवकार ह्या 72 वर्सां पिरायेच्या बायलेची निवड जाल्या. उपसरपंंचपदाचेर कालिदास गांवकार हांंची निवड जाल्या. सगल्यांत जाण्टी सरपंंच जावपाचो भोवमान रूक्मिणी गांवकार हिका फावो जाला.
6 पंंचायतींचें सरपंंच, उपसरपंंचपद बायलांंक
लोटली, अस्नोडें, सुकूर, ठाणें, कांदोळी , खाजन – पोरस्कडें ह्या पंंचायतींचें सरपंंचपद तशेंच उपसरपंंचपदाचेर बायलांंची निवड जाल्या. जोएना फर्नांडीस आनी सेलिना ब्रागांंझा ह्यो लोटलीच्यो सरपंच आनी उपसरपंंच आसात. सोनिया पेडणेंकार आनी माया केणी ह्यो सुकूरच्यो सरपंंच आनी उपसरपंच जाल्यात. अस्नोडें पंंचायतीचे सरपंंचपद सुषमा मालवणकार हिका जाल्यार उपसरपंंचपद सपना मापारी हिका मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
