भांगरभूंय | प्रतिनिधी
राजद्रोह कायद्यांतल्या तरतुदींचो फेरविचार जाय मेरेन ताच्या वापराचेर सर्वोच्च न्यायालयान बंदी घाल्या. 152 वर्सांत पयलेच खेप ह्या कायद्यांतल्या तरतुदींक स्थगीती दिल्या. सर्वोच्च न्यायालयाचे सरन्यायाधीश एन व्ही रामण्णा, न्यायमूर्ती सूर्यकांत आनी न्यायमूर्ती हिमा कोहली हांच्या खंडपीठान हो निकाल दिला. आतां फुडली सुनावणी जुलयाच्या तिसऱ्या सप्तकांत जातली. तो मेरेन घडये हें कलम रद्द जावये.
न्यायालयान केंद्र सरकाराक ह्या कायद्या विशीं साबार प्रस्न विचारल्यात. 124 अ खाला जांकां अटक जाल्या तांच्या अधिकारांची राखण जावपाक राज्यां खातीर तुमी मार्गदर्शक तत्वां तयार करपाक शकतात, अशें न्यायालयान केंद्र सरकाराक विचारलां. जे लोक ह्या कायद्या खाला बंदखणींत आसात वा जांचेर ह्या कायद्या खाला खटले आसात, ते जामिना खातीर अर्ज करपाक शकतात. राष्ट्रीय प्रतिकां वा संविधानाचो अपमान वा विटंबणा केल्यार, सरकाराच्या विरोधांत बरयल्यार, उलयल्यार राजद्रोह जावपाक शकता. सरकारा आड दुस्वास, असंतोष पातळावपी भाशण पसून राजद्रोहाचे कक्षेंत येवपाक शकता. राजद्रोही संघटनांक कोणे सहकार्य केल्यारूय हें कलम लावपाक मेळटा. विशेश म्हणल्यार ह्या कायद्याचो गैरवापरुय जावपाक शकता. न्हय खूबदां जाला. इंग्लीश शिक्षण भारतांत हाडपी थाॅमस मॅकाॅलेन हो कायदो तयार केल्लो. पयले फावट 1897 त लोकमान्य बाळ गंगाधर टिळक हांचे आड हो कायदो वापरिल्लो. फाटल्या 12 वर्सांच्या काळांत 13 हजार भारतीयांक राजद्रोहा खाला अटक जाल्या.
राजद्रोही व्यक्ती
कन्हैया कुमार : जेएनयूचे फुडारी आशिल्ले कन्हैया कुमार हाचेर एक कार्यावळींत भारता विरोधांत घोशणा दिल्ल्याचो राजद्रोहाचो आरोप आसा.
विनोद दुआ : हिमाचल प्रदेशांतल्या एका थळाव्या भाजप फुडाऱ्यान ताच्या युट्यूब शो संबंदी दुआचेर गुन्यांव दाखल केल्लो. मात 3 जून 2021 दिसा सर्वोच्च न्यायालयान राजद्रोहाचो आरोप भायर मारलो.
शशी थरूर : जानेवारी 2021 त नोएडा पुलिसांनी काँग्रेसीचे खासदार शशी थरुर आनी स पत्रकारां आड राजद्रोहाचो गुन्यांव लायिल्लो. शेतकऱ्यांच्या ट्रॅक्टर रॅली मजगतीं हिंसाचार जालो ताका सोशल मिडिया पोस्ट आनी डिजीटर प्रसारमाध्यमां जबाबदार आसा, असो आरोप तांणी केल्लो.
सिद्दीक कप्पन : ऑक्टोबर 2020 त उत्तर प्रदेश पुलिसांनी केरळाचे पत्रकार सिद्दीक कप्पन आनी हेर तिगांचेर राजद्रोहा सयत विवीध आरोपां खाला गुन्यांव दाखल केल्लो. कप्पन हे हाथरस कथित सामूहिक बलात्कार प्रकरणाची कव्हरेज आनी कागाळ करपाक हाथरसाक वताले.
दिशा रवी : शेतकरी चळवळीक तेंका दिवपी संवसारीक आॅनलायन मोहिमे खातीर टुलकिट शॅर केल्ले खातीर पर्यावरण वावुरपी दिशा रवी हिचेर राजद्रोह गुन्यांव दाखल केला.
असीम त्रिवेदी : 2012 त कानपूराच्या व्यंगचित्रकार असीम त्रिवेदी हाका संविधानाचेर टिका केल्ले खातीर अटक जाल्ली. उपरांत मुंबय न्यायालयान ताका क्षुल्लक कारणां वयल्यान कसलोच विचार करीनासतना अटक केली अशें म्हणिल्लें.
हार्दिक पटेल : गुजरातांत पाटीदारांच्या आरक्षणाची मागणी करपी हार्दिक पटेलाच्या 25 मार्च 2015 दिसा जाल्ले रॅलीक लागून राज्यांत हिंसाचार जाल्लो. ताणें हिंसाचार पातळचो आनी वेंचून आयिल्लें सरकार उडोवपाचो कट केल्लो असो आरोप राजद्रोह कलमा खाला ताचेर लायिल्लो.
राणा दांपत्य : अमरावतीची खासदार नवनीत राणा आनी तिचो घोव बडनेराचो आमदार रवी राणा हांणी मुख्यमंत्री उद्धव ठाकरे हांचें घर ‘मातोश्री’ भायर हनुमान चालिसा वाचपाची घोशणा केल्ली. मुख्यमंत्र्याकूय आव्हान दिल्लें. मागीर पुलिसांनी राजद्रोहाचें कलम लावन राणांक अटक केल्ली. 12 दिसां उपरांत तांकां सशर्त जामीन मंजूर केल्लो.
उमर खालीद, शरजील इमाम, गौतम नवलखां, रोना विल्सन, शोमा सेन, वरवरा राव अशा जायत्या लोकांचेर राजद्रोहाचो आरोप आसा. आतां न्यायालयान ह्या कलमाक स्थगीती दिल्ल्यान हे सगळे सुटपाची शक्यताय आसा.
जल्मभर बंदखण जावं येता
राजद्रोहाच्या प्रकरणांत दोशी सिद्ध जायत जाल्यार तीन वर्सां ते जल्मठेपेची ख्यास्त जावपाक शकता. राजद्रोह हो अजामीनपात्र गुन्यांवाचे श्रेणींत येता. ही व्यक्ती सरकारी नोकरे खातीर अर्ज करपाक शकना. तिचो पासपोर्ट रद्द जाता. न्यायालयांत हजर जावचें पडटा. आदल्या तेंपार राज्यांतल्यान धांवडावन घालताले. हो कायदो ब्रिटीशांनी आपल्या देशांत 13 वर्सां पयलीं रद्द केला. सध्या भारता सयत इराण, अमेरिका, सौदी अरेबिया, ऑस्ट्रेलिया, मलेशिया ह्या देशांनीच तो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
