12 कोटी रुपया खर्च करून म्हशीचें मळ मैदानार खेळां सुविधाः विश्वजीत राणे

भांगरभूंय | प्रतिनिधी

भांगरभूंय । प्रतिनिधी
वाळपयः नाणूस हांगच्या म्हशीचें मळ मैदानार वट्ट 12 कोटी रुपया खर्च करून खेळा सुविधा तयार करपाची घोशणा वाळपयचो आमदार आनी भलायकी मंत्री विश्वजीत राणे हांणी केली.  तीन कोटी रुपया खर्च करून वाळपय पालिकेच्या मैदानाच्या सोबितीकरण कामाचें उक्तावण  केल्या उपरांत ते उलयताले. सत्तरीच्या गांवगिऱ्या वाठारांत शारांत आसात ते प्रमाण खेळा सुविधा उपलब्द करून दिवपा कडेन आपूण लक्ष दितलों अशें तांणी सांगलें.
नगरपालिका वाठारांत खेळ आनी वॅलेसन क्किनिका खातीर यत्न करतलों. वाळपय सरकारी उच्च माध्यमीक विद्यालयाचे इमारतीची दुरुस्ती करपाचें काम हातांत घेतलां. फुडाराक सत्तरी तालुक्यांत साठ कोटी उदरगती खातीर खर्च करतले. वाळपय पालिका क दर्जाची आसली तरी उदरगतीच्या कामांक निधी उणो पडपाक दिवचे नात अशेंय राणे हांणी सांगलें.
कार्यावळीक पर्येची आमदार दिव्या राणे, नगराध्यक्ष शेहझीन शेख, उपनगराध्यक्ष अनिला काटकार, जीसुडाचे संचालक गुरुदास पिळर्णकार, अभियंतो हुसेन शेक मुजावर, पालिका मुख्याधिकारी सूर्याजीराव राणे, नगरसेवक रामदास शिरोडकार, आदलो उपसभापती  नरहरी हळदणकार, केरी जिल्हो पंचायत वांगडी देवयानी गावस, नगरगाव जि.पं. वांगडी राजश्री काळे, विनोद शिंदे, अशोक केंकरे हाजीर आशिल्ले. सूत्रनिवेदन किरण नार्वेकारान केलें. नगरसेवक प्रसन्ना गांवसान उपकार मानले.