भांगरभूंय | प्रतिनिधी
1965 उपरांत राज्यांतल्या वीज सुविधांचे अपग्रेडेशन
मडगांव, प्रतिनिधी : पयलीं वीजमंत्री कामा करताले, पूण ते फकत आपापल्या मतदारसंघांतच. आतां राज्यभरांत वीज खात्यान 1000 कोटी रुपयां परस चड उदरगतीच्या कामांक सुरवात केलां. आतां कुडटरी आनी फातोड्डेंच्या भूंयगत वीज मार्गांचें 40 कोटीचें काम जातलें. 1965 वर्सा घाल्ल्यो वीज लायनी बदलपाचें काम, सबस्टेशन अपग्रेड करपाचें काम सुरू आसा. हाका लागून राज्यांतली वीज समस्या उणी जातली, अशें मत वीज मंत्री सुदीन ढवळीकार हांणी उक्तायलें.
मडगांवच्या बीपीएस क्लबाच्या सभाघरांत वीज खात्यान आयोजीत केल्ले कार्यावळींत कुंकळ्ळी ते फातोड्डें वीज सबस्टेशन डबल सर्कीट भुंयगत केबल घालपाचें, फातोड्डें ते राय सबस्टेशन मेरेन इंटरलिंक लायनी घालपाचें सुमार 30 किमीच्या 40 कोटी 50 लाखांच्या कामांची सुरवात केली. ह्या वेळार मंत्री सुदिन ढवळीकार, आमदार विजय सरदेसाय, आमदार आलेक्स रेजिनाल्ड, अधीक्षक अभियंतो राजीव सामंत, कार्यकारी अभियंतो डायगो कुतिन्हो हाजीर आशिल्ले.
फातोड्डें आनी कुडटरे वीज समस्या उणी करपा खातीर हातांत घेतिल्लें काम पुराय जाले उपरांत कुंकळ्ळी आनी वेर्णा ह्या दोनूय सबस्टेशनांतल्यान वीज पुरवण जातली. हाचे भायर फातोड्ड्यांत 4 नवे ट्रान्सफॉर्मर, 5 पोरने ट्रान्सफॉर्मर 400 केव्ही मेरेन वाडयतले, कुडतरी हांगा 15 नवे ट्रान्सफॉर्मर बसयतले. ते प्रमाण 1.7 कोटी आनी 2.93 कोटीचीं कामां फातोड्डेंत जातली. हाका लागून फुडल्या 30 वर्सांत वीज समस्या निर्माण जावची ना अशें वीज अधीक्षक अभियंतो राजीव सामंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
