भांगरभूंय | प्रतिनिधी
नवी दिल्ली, खबरां संस्था ः आयसीएमआर म्हणल्यार इंडियन काउन्सिल ऑफ मेडिकल रिसर्च हांच्या डेटा प्रमाण भारतांत 10.1 कोटी लोकांक उच्च रगतदाब आनी 31.5 कोटी लोकांक गोडेंमूत आसा. चिंतेची गजाल म्हणल्यार ह्या चडशा लोकांक गोडेंमूत वा उच्च रगतदाब आसा हाची जाणविकाय लेगीत ना.
व्यस्त जिणें पद्दतीक लागून कुडींत कांय बदल घडटात, जे आमकां कळना. हे असंसर्गजन्य दुयेंस आसून, ते कुडींत कसलीच लक्षणां नासतना पातळटात. ह्या दुयेसांक सायलेंट किलर अशें म्हण्टात. कारण कुडीक व्हड प्रमाणांत लुकसाण जाल्यारूच ते दिसतात. हाका लागून काळजाचो आताक, स्ट्रोक, मूत्रपिंड अपेसी जावप अशीं धोक्याचीं परिस्थिती निर्माण जावंक शकतात.
गोडेंमूताची सुरवातेची लक्षणां…
परतून परतून तान लागप, मुतपाक जावप, थकवो जाणवप, वजन देंवप, कातीचेर खाज येवप.
उच्च रगतदाबाची लक्षणां…
तकली दुखप, थकवो जाणवप, न्हिदेचो त्रास जावप, मदीं मदीं नाकातल्यांन रगत येवप, काळजात दुखप.
गोडेंमूत आनी उच्च रगतदाब आडावपाक कितें करचें?
मीठ आनी साकरेचे सेवन उणें करचें: दिसपट्ट्या आहारांत मीठ आनी साकर हांचे प्रमाण नियंत्रीत करचें. दिसाक चडांत चड 5 ग्राम मीठ खावप आनी साकर खावपाचेर मर्यादा घालची.
व्यायाम: दर दिसा उण्यांत उणें 30 मिनटां व्यायाम करचो. हाका लागून रगतांतली साकर आनी रगतदाब नियंत्रीत करपाक मजत जाता.
आदींच तपासणी करात: रगतांतली साकर आनी रगतदाब नेमान तपासपाक विसरूं नाकात.
7 वरां बरी न्हीद घेवची: फावो ती न्हीद घेतल्यार हार्मोनल समतोल दवरपाक मजत जाता, जी गोडेंमूत आनी उच्च रगतदाब नियंत्रीत करपाक मजत करता.
ताण वेवस्थापन करात: ध्यान, योग वा तुमच्या आवडीच्यो कार्यावळी करपाक वेळ घालवप मानसीक भलायके खातीर फायदेशीर आसता.
कुटुंबांत दुयेंस आसल्यार चड जतनाय घेयात…
कुटुंबांतल्या कोणाकूय गोडेंमूत वा उच्च रगतदाब आसल्यार मागीर ताका चड धोको आसूं येता. हे दुयेंस अनुवंशीक नदरेनय धोको निर्माण करपाक शकतात. कुटुंबीक इतिहास ना जाल्यार जिवीतशैलीय एक मुखेल कारण जावंक शकता. संवय बऱ्यो ना जाल्यार मागीर मनीस ह्या दुयेंसांक बळी पडूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
