भांगरभूंय | प्रतिनिधी
दिवाळी फुलतली; सरकारी कर्मचाऱ्यांक खोशयेची खबर
भांगरभूंय । प्रतिनिधी
पणजी : केंद्र सरकारान कर्मचाऱ्यां खातीर बोनस जाहीर केल्या उपरांत आतां राज्य सरकारान लेगीत ब गटांतल्या अराजपत्रीत आनी क गटांतल्या सगळ्या कर्मचाऱ्यां खातीर बोनस जाहीर केला. जांच्या पगाराची श्रेणी 4 हजार 600 परस उणी आसा, तांकां बोनसाचो लाव मेळटलो.
ई पेमेंट पद्दतीन 10 नोव्हेंबरा आदीं हो बोनस पात्र सरकारी कर्मचाऱ्यांक मेळटलो. केंद्रान 17 ऑक्टोबराक केंद्रीय कर्मचाऱ्यां खातीर बोनस जाहीर केल्लो. केंद्र सरकाराच्या मार्गदर्शक तत्वां प्रमाण राज्य सरकार बोनस दिता, अशी म्हायती अर्थ फाट्यांतल्या अवर सचिवांनी दिली. जे कर्मचारी 1 एप्रील 2023 उपरांत सरकारी सेवेंत दाखल जाल्या आनी जांकां 4 हजार 600 रुपयां परस चड ग्रेडीचो पगार आसा, तांकां बोनसाचो लाव मेळचो ना. केंद्रान कर्मचाऱ्यांक गैर उत्पादकता लिंक्ड बोनस दिवपाची घोशणा केल्या. केंद्र सरकाराचे गट ब आनी गट क खाला येवपी अराजपत्रीत कर्मचारी जे खंयच्याच बोनसाचे येवजणेंत नात, तांकांच बोनस मेळटलो. असोच निर्णय राज्य सरकारान घेतला. जे सरकारी कर्मचारी 31 मार्च 2023 मेरेन सरकारी सेवेंत आसात आनी जांणी उण्यांत उणें 6 म्हयने काम केलां तांकां हो बोनस मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
