भांगरभूंय | प्रतिनिधी
8 आनी 9 जानेवारीक भौशीक सुनावणी
भांगरभूंय । प्रतिनिधी
पणजी: नव्या वर्सांत गोंयचे विजेचें घरगुती तशेंच उद्देगीक बील वाडपाची शक्यताय आसा. वीज दरवाडीचो प्रस्ताव वीज खात्यान जोड वीज नियमन आयोगा कडेन (जेईआरसी) दवरला. ह्या प्रस्तावाचेर 8 आनी 9 जानेवारीक भौशीक सुनावणी जातली. जोड वीज नियमन आयोगान मान्यताय दिले उपरांत वीज बिलांचे दर वाडटले. वीज दर वाडीक मान्यताय मेळ्ळी जाल्यार ती 1 एप्रील 2024 ह्या दिसाच्यान लागू जातली.
सध्या पयल्या 100 युनिटा मेरेन विजेचो दर 1.75 रूपया प्रती किलो वॅट आवर आसा तो 1.88 रुपया प्रती किलो वॅट आवर करपाचो प्रस्ताव आसा. 101 ते 200 युनिटा मेरेन 2.6 रुपया प्रती किलो वॅट आवरा वयल्यान 2.79 रुपया करपाचो प्रस्ताव आसा. 201 ते 300 युनीट मेरेन 3.3 रुपया वयल्यान 3.7 रुपया करपाचो प्रस्ताव आसा. उद्देगीक, शेती, वेवसायीक विजेचे दर लेगीत वाडोवपाचो प्रस्ताव आसा.
वीज दरवाडीच्या प्रस्तावाचेर वीज खात्यान सुचोवण्यो मागयल्यात. सुचोवण्यो 5 जानेवारी 2024 मेरेन सादर करप बंधनकारक आसा. उत्तर गोंया खातीर 8 जानेवारी 2024 ह्या दिसा पणजे मिनेझीस ब्रागांझा सभाघरांत भौशीक सुनावणी जातली. दक्षीण गोंया खातीर 9 जानेवारी 2024 ह्या दिसा मडगांवां माथानी साल्ढाणा संकुलांत भौशीक सुनावणी जातली. हे विशींची भौशीक सुचोवणी जारी जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
