सां फ्रान्सीस झेवीयर पवित्र कूड दर्शन सुवाळ्याक सुरवात
भांगरभूंय | प्रतिनिधी
उक्तावणाक हजारांनी भाविकांनी लायली हाजेरी
पणजी : दरेकी धा वर्सांनी जावपी सां फ्रान्सिस झेवियर पवित्र कूड दर्शन सुवाळ्याक बिरेस्तार सावन हजारांनी भावीकांचे उपस्थितींत सुरवात जाली. ४५ दीस म्हणल्यार ५ जानेवारी २०२५ मेरेन पवित्र कूड दर्शना खातीर पोरणें गोंयच्या सी कॅथेड्रल इगर्जेंत आसतली. राज्यपाल पी. एस. श्रीधरन पिल्लई, मुख्यमंत्री डॉ. प्रमोद सावंत, येरादारी मंत्री मॉवीन गुदिन्हो हांचे सयत हेर मानेस्तांनी पवित्र कुडीचें दर्शन घेतलें. दिल्लीचे आर्चबिशप अनिल कुटो, आर्चबिशप फिलीप नेरी फेर्रांव हांचे सयत हेर आर्चबिशप हाजीर आशिल्ले. उक्तावणाच्या मिसा उपरांत संगीताच्या तालार पवित्र कूड बॅसिलिका इगर्जेंतल्यान सी कॅथेड्रल इगर्जेंत व्हेली.
देश- विदेशांतल्यान ५० लाखां वयर पर्यटक आनी भक्त पवित्र कुडीचे दर्शन घेतले. भाविकांक पिवपाचें उदक, शौचालय, रेस्ट रुम, दिका दाखोवपाचे बोर्ड, पार्किंगांतल्यान इगर्जेंत वचपा खातीर खाशेल्यो गाडयो हांची वेवस्था आसा.
पवित्र कूड दर्शन सुवाळ्या खातीर हेर राज्यां सयत परदेशांतल्यान भावीक येतात. भाविकांक रावपा खातीर पिलिग्रिमेज विलेजीची खासा वेवस्था केल्या. अंदूं पयलेच खेपे अशा तरेची रावपाची वेवस्था केल्या. ३ डिसेंबराक जावपी फेस्ताक मुख्यमंत्री आनी हेर मानेस्तांक खासा आमंत्रणां दिल्यांत. २७ डिसेंबराक लायट आनी म्युझिक शो जातलो. जो अंदूंचे कार्यावळीचें खाशेलें आकर्शण आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
