भांगरभूंय | प्रतिनिधी
भांगरभूंय प्रतिनिधी
पणजी : संजिवनी साकर कारखान्यांत इथेनॉल निर्मिती प्रकल्प सुरू करपाची प्रक्रिया सुरू आसा. फुडल्या हंगामांत इथेनॉल निर्मिती प्रकल्प स्थापन जातलो, अशें शेतकी मंत्री रवी नायक हांणी स्पश्ट केलें. इथेनॉल निर्मिती प्रकल्पा वरवीं संजिवनी साकर कारखान्यांतल्या कामगारांच्या हिताची जपणूक जातली, अशें तांणी सांगलें.
संजिवनी साकर कारखान्याच्या कामगारांक स्वेच्छा निवृती दिवपाचो निर्णय जाला. हाका लागून ऊस उत्पादक शेतकारां मदीं भिरांत निर्माण जाल्या. ऊस उत्पादक शेतकारांनी विचारविनीमय करपा खातीर 25 जूनाक साबार बसका आपयल्या. संजिवनी साकर कारखान्यांत अजून मेरेन इथेनॉल निर्मिती प्रकल्प सुरू जावंक ना. सध्या कारखानो बंद आसा. आतां कामगारांक स्वेच्छा निवृत्ती दिवपाचो निर्णय जाला. ताका लागून संजिवनी साकर कारखानो बंद जातलो, अशी भिरांत शेतकारां मदीं तयार जाल्या.
संजिवनी साकर कारखान्याच्या जाग्याचेर इथेनॉल निर्मिती प्रकल्प जातलो. ऊस शेतकारांनी भिवपाचें कारण ना. कामगारांच्या हिताची जपणूक जातली. हाचेर खोलायेन विचार जावन फुडलो निर्णय जातलो, अशें शेतकी मंत्री रवी नायक हांणी सांगलें.
इथेनॉल प्रकल्प ‘पीपीपी’ तत्वाचेर सुरू जातलो. इथेनॉल निर्मिती प्रकल्पाच्यो तंत्रीक बोली उक्त्यो जाल्यात. अर्थीक बोली उक्त्यो जावपाच्यो आसात. सरकाराचे ‘पीपीपी’ खातें अर्थीक बोलींचेर निर्णय घेतले. म्हयन्याभरात अर्थीक बोलीं विशीं चित्र स्पश्ट जातलें, अशें शेतकी खात्याचे संचालक नेव्हील आफोंसो हांणी सांगलें.
संजिवनी साकर कारखान्या विशीं अभ्यास करून निर्णय घेवपा खातीर सरकारान 21 वांगड्यांची समिती स्थापन केल्ली. आदले खासदार अॅड. नरेंद्र सावयकार हांचे फुडारपणा खाला समितीन वावर सुरू केला. सल्लागारांच्या निर्णया उपरांत इथेनॉल निर्मिती प्रकल्प ‘पीपीपी’ तत्चाचेर स्थापन करपाचो निर्णय जाला. फाटल्या ऑक्टोबरांत सरकारान इथेनॉल निर्मिती प्रकल्पा खातीर आरएफक्यू मागयिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
