शेजाऱ्यांचो हक्क पाळप म्हत्वाचें

भांगरभूंय | प्रतिनिधी

आपणें वायट केल्यार ख्यास्त मेळटली, अल्ला नरकांत घालतलो, हें जाका कळटा, ताणें शेजाऱ्यांक दुख्ख दिवचें न्हय.

इस्लाम धर्मांत शेजाऱ्यांचो हक्क पाळप खूब म्हत्वाचें. पैगंबर मुहंमद हांणी सांगलां, शेजाऱ्यां कडेन बरे तरेन वागपाक जाय. तांचो रेस्पेद करपाक जाय आनी तांची जतनाय घेवपाक जाय. कुराणांत अध्याय अन- नीसांत बरयला कीं, ‘अल्लाहची आराधना करात, ताचे कडेन कोणाक जोडू नाकात. बरे वागात आवय बापाय कडेन, सोयऱ्यां कडेन, अनाथा कडेन, दुबळ्यां कडेन, लागींच्या शेजाऱ्यां कडेन, पयसुलल्या शेजाऱ्या कडेन, आपल्या वांगड्या कडेन आनी प्रवाशां कडेन.’

हाचे वयल्यान कळून येता की, शेजाऱ्यां कडेन बरें वागप हो अल्लाहचे भक्तीचो वांटो.

पैंगबर मुहंमद हांणी सांगलां, देवाच्या दुतान जिबरीलान आपणाक परत परत शेजाऱ्यांच्या हक्कां बाबतींत सांगलां. म्हाका दिसलें कीं ते म्हजे वारस काय? 

शेजाऱ्यांच्या हक्कां विशीं इस्लाम आमकां शिकयता की –

1. आमी जेन्ना शेजाऱ्यांक मेळटात तेन्ना ताचें बरें जावं अशे अभिवादन करपाक जाय. 

2. शेजाऱ्यांक गरज आसता, तेन्ना आमी तांकां पावपाक जाय. 

3. शेजाऱ्याक भेट वा खाण दिवपाक जाय.

4. शेजाऱ्यांक केन्नाच कसलोच त्रास दिवपाक जायना. 

5. शेजाऱ्यांच्या वस्तुंचो मान दवरपाक जाय.

6. शेजारी खंयच्या धर्माचे आसूं तांचे कडेन बरेपणान वागपाक जाय. 

पैंगबर मुहंमद हांणी सांगलां कीं, ‘जाचें पोट भरिल्लें आसा आनी ताचो शेजारी उपाशी आसा, तो मुसलमान न्हय.’ म्हणजे आमी लक्ष दवरपाक जाय की आमचो शेजारी उपाशी आसा काय ना, ताचे कडेन जेवपा- खावपाचें सामान आसा काय ना. जर ना जाल्यार आमचे कडेन आसा तातूंतलें थोडें ताकाय दिवपाक जाय. जर अशें केलेंना जाल्यार पैगंबरान सांगलां, की तो खरो मुसलमान न्हय. 

पैगंबर मुहंमदान आमकां सावधान केलां, ‘अल्लाचो सोपूत तो श्रद्धाळू ना.’ म्हणल्यार जो आपल्या शेजाऱ्याक त्रास करता तो श्रद्धाळू ना. तो अल्लाची आराधना सारकी करीना. आराधनेंत हेय नेम पाळपाक जाय. शेजाऱ्याक त्रास दिवप हें पापकर्म. इस्लाम धर्म आमकां शिकयता की शेजारी कोणूय आसतो तरी ताचे कडेन बरेपणान वागपाक जाय. ताच्या धर्माचो रेस्पेद करपाक जाय. 

पैगंबर मुहंमद हांणी सदांच आपल्या शेजाऱ्यांचो रेस्पेद राखला. तांकां मजत केल्या. तांचे शेजारी ज्यू आशिल्ले. ते तांकां जेवण- खाण धाडटाले. शेजारी पैगंबरा कडेन बरो वागनासलो, तरीय ते ताचे कडेन पासियेंसांत वागताले. तांणी म्हणलां, जेन्ना तुमी रांदतात, तातूंत आनीक इल्लें उदक घालात आनी आपल्या शेजाऱ्यांकूय दियात. हाचो अर्थ, जर तुमचे कडेन इल्लें आसा जाल्यार तातूंत इल्ले उदक घालात आनी तें शेजाऱ्यांक दियात. हाचे वयल्यान कळून येता की ल्हानशें बरें कार्य करपाक पसून इस्लाम धर्मांत चड म्हत्व दिलां. 

एकदां पैगंबर मुहंमद हांच्या शेजाऱ्यान तांच्या घराकुशीक कोयर उडयलो, तेन्ना पैगंबर बेजार जावंक नात. तांचो हो शेजारी दुयेंत पडलो तेन्ना ते ताचे खबरी गेले. जे अल्लाची आराधना करतात, उपास करतात, दान दितात, पूण शेजाऱ्याक त्रास दितात जाल्यार तांचो सभाव बरो न्हय अशें इस्लाम म्हणटा. शेजाऱ्याच्या सुखांत, दुख्खांत वाटो घेवंक जाय, अशें इस्लाम सांगता. अल्लाचेर खरी आस्था दवरपी केन्नाच शेजाऱ्याक वायट उतरां दिनात, ताच्यो चाडयो करीनात. 

पैगंबरान म्हणलां, जो अल्लाक मानता आनी निमण्या दिसाक मानता, तांणी शेजाऱ्याक दुख्ख दिवचें न्हय. जो अल्लाक भियेंता, आपणें वायट केल्यार ख्यास्त मेळटली, अल्ला नरकांत घालतलो, हें जाका कळटा, ताणें शेजाऱ्यांक दुख्ख दिवचें न्हय.

इस्लाम धर्म शिकयता- 

1. दुसऱ्याच्या घरांत दोळे दवरचे न्हय. म्हणजे दुसऱ्यांच्या खाजगी गजालींनी आपूण मदीं पडचें न्हय. 

2. व्हडल्यान आवाज करून शेजाऱ्यांची शांती भंग करची न्हय.

3. आपलें वाहन दुसऱ्यांच्या घरा सामकार दवरून तांका त्रास दिवचे न्हय. 

असल्यो बारीक- सारीक गजाली इस्लाम शिकयता.

तुमचें आनी शेजाऱ्याचें रक्ताचें नातें ना तरी तुमी एक फामील आसा. पैगंबरान म्हणलां, तुमी शेजाऱ्यां कडेन बरे वागात आनी तुमी एक बरे अल्लाचे भक्त जातले. जो कोण बरो वागता ताचेर अल्ला मोग करता. ताच्या घरांत कांयच उणें करीना. देवदूत ताचे पासत अल्ला कडेन प्रार्थना करता. ताचे कडल्यान जाल्ल्या पापाची ताका माफी मेळटा. पैगंबर सदांच आपल्या वांगड्यांक तांच्या शेजाऱ्यांच्या घरा वचून तांची वासपूस करपाक लायताले. मजत करपाक सांगताले. आपल्या शेजाऱ्यांक जो त्रास करता, तो केन्नाच सर्गांत वच्चो ना, अशेंय पैगंबर म्हणटाले. अल्लान शेजारी मनशाची परिक्षा घेवपाक आमकां निर्मिल्यात, जर आमी तांचे सवें बरें काम केल्यार आमकां बरें फळ मेळटलें. वायट केल्यार ख्यास्त वा नरक. 

कुराणांत म्हणलां की आमच्या शेजाऱ्यांचो आमचेर हक्क आसा. वायट उतरां उलोवन शेजाऱ्याक त्रास दिवप ना, तांचे बाबतींत वायट उलोवप ना. अल्लाक मानप म्हणजे फक्त ताची आराधना करप न्हय, तर शेजाऱ्यांची कायम मजत करप, शेजाऱ्याक खालतीपण दाखोवप ना, तांकां आपले बरोबरीन हक्क दिवपाक जाय.

एक बरो शेजारी वाठारांत शांती दवरता. अल्ला आमकां सद्बुद्धी दिवं हें सगलें समजपाक आनी बरें कर्म करपाक. 

सफिना शाह

90494 44787