भांगरभूंय | प्रतिनिधी
राज्यपालः ‘श्री अंजनेय स्वामी आनी सत्यमामुनी’ पुस्तकाचें प्रकाशन
पणजीः समाजाक शांततापूर्ण आनी सुसंवादी जीण जगपा खातीर आध्यात्मीक मार्गदर्शनाची गरज आसा. समाजाचे सर्वांगी उदरगती खातीर आध्यात्माचें सदांच व्हड योगदान आसा. भारताची आध्यात्मीक संस्कृताय आनी तिचीं मुल्यां संवसारभर पातळ्ळ्यात. ही तोखणायेची गजाल आसा. गोंय पवित्र भूंय आसून, तिका आध्यात्मीक म्हत्व आसा. ताका लागून राज्याच्या गांवगिऱ्या वाठारांनी आध्यात्मीक आनी ग्रामीण पर्यटनाक उर्बा दिवपाची तांक आध्यात्मांत आसा, अशें राज्यपाल पी. एस. श्रीधरन पिल्लई हांणी म्हणलें.
राज्यपाल पी. एस. श्रीधरन पिल्लई हांचे हस्तुकीं राजभवनांत आयोजीत कार्यावळींत वृंदा श्रीकुमार लिखीत ‘श्री अंजनेय स्वामी आनी सत्यमामुनी’ ह्या पुस्तकाचें हस्तुकीं प्रकाशन जालें.
ह्या वेळार तांचे वांगडा अध्यात्मीक गुरू सत्यमामुनी, लेखिका वृंदा श्रीकुमार आनी गोवन वार्ता लायव्हचे संपादक किशोर नायक गांवकार उपस्थीत आशिल्ले.
ह्या वेळार उलयतना राज्यपाल पिल्लई हांणी म्हणलें, समाजाक शांततापूर्ण आनी सुसंवादी जीण जगपा खातीर आध्यात्मीक मार्गदर्शनाची गरज आसा. थिरुवत्तर, तामिळनाडूंतल्या अंजनेय स्वामी आनी सत्यमामुनी हांच्या जीणेचेर आदारीत पुस्तकाचें प्रकाशन जाल्ले खातीर तांणी खोस उक्तायली.
श्रीमती वृंदा श्रीकुमार हिणें सांगलें, हे पुस्तक तांच्या आध्यात्मीक गुरू सत्यमामुनी हांच्या जिणेंतल्या अणभवांचेर आदारीत अासा. वृंदा ही हनुमानाची भक्त आनी गुरू सत्यमामुनी हांच्या मार्गदर्शना खाला ती ध्यान आनी आध्यात्म साधना करता. ह्या वेळार अध्यात्मीक गुरू सत्यमामुनी हांचेय भाशण जाले.
फोमेंतो मिडियाचे संचालक ज्यो लुईस हांणी येवकार दिलो. गोवा वार्ता लायव्हचे संपादक किशोर नायक गांवकार हांणी सुत्रसंचालन केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
