वास्को, काणकोणां अपघात; दोगांक मरण

भांगरभूंय | प्रतिनिधी

वास्को, काणकोण: शांतीनगर वास्को आयतारा सांजवेळा मोटारीचो धपको दुचाकीक बशिल्ल्यान बायलेक मरण आयलें. जाल्यार काणकोणां भगतवाड्यार मोटार अपघातांत एकल्याक मरण आयलें.

सविस्तर खबरे प्रमाण वास्को शांतीनगरांत आयतारा सांजवेळा एके मोटारीन दुचाकीक फाटल्यान धपको दिल्ल्यान दुचाकीचे फाटल्यान बशिल्ली बायल रिना देवी राकेश (38) हिका मरण आयलें. जाल्यार तिचो घरकार आनी पूत जखमी जाल्ल्यान तांकां उपचारा खातीर चिखलेच्या उपजिल्हो हॉस्पिटलांत व्हेले. ह्या प्रकरणांत वास्को पुलिसांनी पंचनामो करून मोटार चालक लिंगाप्पा कोलकार (28, गांधीनगर, वास्को) हाचे आड गुन्यांव दाखल केला.

वरुणापुरी-शांतीनगर मार्गा वयल्या भारतीय तटरक्षक दळाच्या मुखा वयले वस्तींत भाड्याच्या घरांत रावपी रिना देवी आयतारा सांजवेळा आपलो घरकार आनी पुता सयत दुचाकीन शांतीनगरा वटेन वतालीं. शांतीनगरांत पावले उपरांत फाटल्यान नेटान आयिल्ले मोटारीचो धपको दुचाकीक बसलो. ताका लागून फाटल्यान बशिल्ली रिना देवी दुचाकी वयल्यान उसळून थंय उब्या आशिल्ल्या ट्रकाचेर आदळ्ळी आनी रस्त्यार पडली. ह्या अपघातांत ती गंभीर जाली. जाल्यार दुचाकी रस्त्याचे कुशीक पडिल्ल्यान तिचो घरकार आनी पूत जखमी जाले.

ह्या प्रकरणांत थळाव्या लोकांनी वास्को पुलिसांक म्हायती दिली. तशेंच 108 अ‍ॅम्बुलन्सीक फोन केलो. मजगतीं चड वेळ व्हगडाय नासतना दुचाकीक धपको दिवपी मोटारींतल्यानूच तिका आनी हेरांक उपचारा खातीर चिखली उपजिल्हो हॉस्पिटलांत व्हेलीं.

मजगतीं, उपचारा पयलींच रिना देवीक मरण आयलें. मयत रिना हिका तीन धुवो आनी एक पूत आशिल्ल्याचें तिच्या शेजारा कडल्यान म्हायती मेळ्ळी.

काणकोण भगतवाड्यार

अपघात; एकल्याक मरण

मजगतीं, मूळ हुबळी कर्नाटकांतलो मंजुनाथ यल्लप्पा हेबगर (43) ह्या मनशाक अपघातांत मरण आयलें. हो अपघात शेनवारा दनपारां 1.20 वरांचेर भगतवाड्यार घडिल्लो.

हुबळी सावन काणकोणचे दिशेन मडगांवां वचपी फिगो मोटारीचो चालक अक्षय सुनील अमगर (26) हाचो मोटारी वयलो ताबो गेलो आनी ताणें राष्ट्रीय म्हामार्गा वयल्या दिशादर्शक फलकाच्या खांब्याक नेटाचो धपको दिलो. तातूंत ड्रायव्हराचे कुशीच्या सिटार बशिल्ल्या मंजुनाथाक हॉस्पिटलांत उपचारा वेळार मरण आयलें.

काणकोण पुलीस स्टेशनाचे हवालदार धनंजय देसाय हांणी अपघाताचो पंचनामो केला. फुडलो तपास काणकोण पुलीस करतात.