भांगरभूंय | प्रतिनिधी
पद्मश्री विनायक खेडेकार, पं. प्रभाकर कारेकार हांकां गोमंत विभूषण पुरस्कार भेटयलो
भांगरभूंय । प्रतिनिधी
पणजीः गोंयांतल्या लोककलांचे जतन करून ते फुडले पिळगे मेरेन सांबाळून दवरपा खातीर तांचे दस्तावेजीकरण करपाचें काम कला आनी संस्कृती खात्यान सुरू केलां. तें बेगीनूच पुराय जातलें, अशें, मुख्यमंत्री डॉ. प्रमोद सावंत हांणी मंगळारा स्पश्ट केले.
गोंय घटकराज्य दिसाचे फाटभुंयेर पद्मश्री विनायक खेडेकार आनी पं. प्रभाकर कारेकार हांकां राजभवनांतल्या दरबार हॉलांत प्रतिश्ठेच्या गोमंत विभूषण पुरस्कारान भोवमानीत केले. ह्या वेळार आयोजीत कार्यावळींत मुख्यमंत्री मुखेल सोयरे ह्या नात्यान उलयताले.
ह्या वेळार तांचे वांगडा कला आनी संस्कृती मंत्री गोविंद गावडे, मंत्री नीळकंठ हळर्णकार, मॉवीन गुदिन्हो, सुभाष फळदेसाय, आमदार दिगंबर कामत, मायकल लोबो, मुख्य सचीव पुनीत कुमार गोयल, कला आनी संस्कृती खात्याचे सचीव मिनिनो डिसोझा, म्हायती आनी प्रसिद्धी खात्याचे सचीव सुभाष चंद्रा आनी कला, संस्कृती खात्याचे संचालक सगुण वेळीप हाजीर
आशिल्ले.
मुख्यमंत्री डॉ. प्रमोद सावंत हांचे हस्तुकीं 2019-20 वर्सांचो लोककला क्षेत्रांतलो गोमंत विभूषण पुरस्कार विनायक विष्णू खेडेकार हांकां, जाल्यार 2021-22 वर्साचो भारतीय शास्त्रीय संगीत क्षेत्रांतलो पुरस्कार पं. प्रभाकर जनार्दन कारेकार हांकां भेटयलो.
गोंयांतल्या लोककलांचे जतन करून ते फुडले पिळगे मेरेन पावोवपांत विनायक खेडेकार हांचो मोलाचो वांटो आसा. जाल्यार गोंयचे सूपूत आशिल्ले पं. प्रभाकर कारेकार हांणी शास्त्रीय संगीत फक्त गोंयांतूच न्हय जाल्यार जगभरांत पावयले. लोककला आनी शास्त्रीय संगितांतले केजी ते पिजी मेरेनचें शिक्षण दिवपी गोंय हें देशांतलें पयलें राज्य. ‘स्वयंपूर्ण गोंय’ च्या माध्यमांतल्यानूय राज्य सरकार कला आनी संस्कृती
क्षेत्रां विशीं विवीध उपक्रम राबयता, अशें मुख्यमंत्री डॉ. सावंत हांणी सांगलें.
मजगतीं, पद्मश्री खेडेकार आनी पं. कारेकार ह्या दोगायनीय गोमंत विभूषण पुरस्कार फावो जाल्ले खातीर खोस उक्तायली. जागतिकीकरणाच्या फाटभुंयेर ना जायत आशिल्ल्या गोंयांतल्या लोककलांचे दस्तावेजीकरण करपाची मागणी खेडेकार हांणी सरकारा कडेन केल्या. जाल्यार जल्मभूंयेत संगीत क्षेत्रांतलो सर्वोच्च पुरस्कार मेळिल्ले खातीर पं. कारेकार हांणी खोस उक्तायल्या.
सुरवातीक कला आनी संस्कृती सचीव मिनीनो डिसौजा हांणी मानेस्तांक येवकार दिलो आनी निमाणे म्हायती आनी प्रसिध्दी सचीव सुभाष चंद्रा हांणी उपकार मानले.
युवा कलागुणांक प्रोत्साहन दिवपाची गरजः मुख्यमंत्री
कला आनी संस्कृती क्षेत्रांतल्या विकासा खातीर युवा कलागुणांक प्रोत्साहन दिवपाची गरज आसा. सरकार कलाकारांच्या योगदानाची योग्य दखल घेता आनी तांकां प्रोत्साहन दिवपा खातीर विंगड विंगड येवजणो राबयता. तेच प्रमाण पुरस्कार भेटोवन तांचो भोवमान करता अशें, मुख्यमंत्री डॉ. प्रमोद सावंत हांणी सांगलें. युवकांनी शिक्षण, कला आनी संस्कृती आनी हेर मळार गुणवत्ता दाखोवन स्वता बरोबरच राज्याकूय अभिमान मेळोवन दिवपाची गरज मुख्यमंत्र्यान उक्तायली.
फोटो प्रदर्शन, पुस्तकाचें विमोचन
मुख्यमंत्री डॉ. सावंत हांणी विनायक खेडेकार आनी पं. प्रभाकर कारेकार हांच्या कार्याचेर उजवाड घालपी फोटो प्रदर्शनाचें उक्तावण केले. तशेंच पुस्तकाचेय विमोचन केले. गोमंत विभूशण पुरस्कार जैतिवंत विनायक खेडेकार आनी पं. प्रभाकर कारेकर हांणी सरकारा विशीं कृतज्ञताय उक्तायली. विनायक खेडेकार हांच्या मानपत्राचें वाचन डॉ. अजय वैद्य जाल्यार पं. प्रभाकर कारेकार हांच्या मानपत्राचें वाचन डॉ. पांडुरंग फळदेसाय हांणी केले.
गोंय देशाची सांस्कृतीक राजधानीः गावडे
कला, संस्कृती क्षेत्रांत गोंयचें नांव देशांत वयले सुवातेर आसा. भारताची सांस्कृतीक राजधानी म्हूण गोंयची वळख आसा.
पद्मश्री विनायक खेडेकार
आनी पं. प्रभाकर कारेकार ह्या दोगांयनीय गोंयांतली कला आनी संस्कृतीचे जतन आनी संवर्धन करपाची मोलाची कामगिरी केल्या, अशें मंत्री गोविंद गावडे हांणी म्हणलें. पं. कारेकार हांणी पुरस्कारा खातीर न्हय, जाल्यार आवड, लोकांची मनरिजवण आनी मनाक शांतताय मेळोवन दिवपा खातीर संगिताची आराधना केल्ल्याचे म्हणलें. विनायक खेडेकार हांकां मेळिल्लो पद्मश्री पुरस्कार हो गोंयचो भोवमान आशिल्ल्याचे तांणी नमूद केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
